Natural Na Bulong Asin Kakanon

Kan nag lilinig ako kan si sakuyang kabinet may nariparo akong libro na haloy ko nang hinahanap. An titulo - “Natural Home Remedies” (Mga Natural na Remedyos) ni Dra. Farrah-Arsenia Agustin-Bunch.

Si Dra. Farrah sarong rehistradong doctor na medical sa Pilipinas. Aki siya kan sarong dating bantog na herbalista. Sa tabang asin cooperasyon kan saiyang ama pig pundar niya itong inaapod na Dr. Farrah Agustin-Bunch Natural Medical Center. Ini an nagin primerong “Natural Medical Center” sa Pilipinas na nagbubulong sa natural na paagi nin mga man laen laen na klaseng cancer lalo na idtong mga cancer na nasa stage 4 na an kamugtakan.

Pig bubulong man kaining klinikang ini ni Dra. Farrah an iba pang mga klaseng hilang. Gamit ninda an alternatibo sa pag bulong. May mga natural sindang paagi arog kan pag bulong sa mga pasyente sa paagi nin mga herbal asin mga tinanum na arog kan bawang, siling labuyo, laya, oregano, kalungay, guyabano, asin kadakul pang ibang mga tanum asin mga herbal. May mga na imbento man si Dra. Farrah na bulong gamit an kombinasyon kan mga iba ibang herbal na tanum.

Dakul nang nabulong si Dra. Farrah sa paaging ini. Nagka igwa siya nin mga pirang ribong pasyente. An sarong marhay igdi sa Natural Medical Center na ini, libre an diagnosis, mayong operasyon, mas epectibong pag bulong, asin kaya kan mga tawo an gastos maski anong estado ninda sa buhay.

Pero pagka lihis nin pirang taon dakul nang mga darakulang parmacia an mga nag reklamo laban ki Dra. Farrah. Igwa man mga 5 organisasyon na mga doctor sa Pilipinas an mga nag reklamo laban saiya.

An sabi ni Dra. Farrah pig rereklamo daa siya ta mas barato asin mas epectibo an mga paagi niya.

Pero dae nag haloy naka resibe si Dra. Farrah nin mga pananakot sa buhay. Pananakot saiyang mga aki, mga pasyente, asin saiya mismo na delikado daa an buhay ninda. Pina raid man si klinika niya sa mga 30 mga polis kan FDA. An sunod digdi pina sara kan FDA an Medical Center niya.

Nasa Amerika na ngunian si Dra. Farrah. Kinasuhan niya man an FDA sa mga ginibo ninda saiya pero dae ko aram kung ano nang estado kaini.

Nakaka mundo an nangyari kay Dra. Farrah sa Pilipinas. Imbes na tabangan siya kan gobierno sa pag bulong niya kan mga natural, epectibo asin baratong paagi, pinasara pa ining nobleng trabaho niyang ini.

Nagigiromduman ko kaidtong panahon, kun may bari o lapo ka, mag duman ka lang sa Magarao na may mga matibay na para hilot. Sarong bes na kagat ako nin halas saka dinara ako sa para tambal duman sa calle Calauag sa Naga. May mga pig laag lang sakuya si para tambal na dinukduk na uring asin ok na daa ako. Kun may abo ka o paas an boses, mag inom nin salabat. Kun maraot an tulak, mag inom nin sabaw kan tinutong na bagas. Dakul na tawo kaidto nag gagamit nin Aloe Vera sa buhok. Pwede man an guta nin niyog pampa gayon nin buhok.

Sa madaling pag taram, dakul na mga natural na herbal o mga tinanum an nakaka bulong nin mga iba ibang nama matean nin tawo. Dapat pag adalan kan gobyerno ta asin gamiton ining mga alternatibong ini nganing magka igwa man nin ibang paagi itong mga tawong dae kaya an kamahalan kan pag pa ospital asin mga resetang bulong sa mga parmacia.

Sa ibong na lado naman kan pag urulay; sa Amerika ngunian may mga nag luwas na survey na nagsasabi na halankawon nang maray an gastos kan gobyerno sa pag abot kan “healthcare” o pag asikaso kan salud kan mga Amerikano. Igwa na daang mga 4.5 trillion na dollar an gastos kada taon.

Pero maski daa grabe na an gastos sa pag bulong, mas nag dakul pa si mga kaso kan cancer imbes na mag baba. Igwa pa ngani daang mga bagong hilang na nag luluwas.

Ngunian na maabot na bagong administrasyon sa Amerika, may linaag si Trump na bagong Secretary of Health na iyo si Robert Kennedy, Jr. An sabi ni Kennedy papa karayon niya an salud kan mga Amerikano. Tulong bagay daa kun tano ta mas dakul an nag hihirilang ngunian - bakong marhay na bulong, bakong maray na kakanon, asin bakong marhay na padalagan kan gobyerno.

Iimbistigahan niya daa an mga darakulang parmacia kun ano an mga ingridiente kan mga bulong asin mga vaccine. Iimbistigahan niya man an mga ingridiente kan mga kinakakan ta arog kung paano an sistema kan mga pag proseso. Pag aadalan daa nindang marhay an mga bagay na ini arog kan mga pag laag nin mga insecticide o mga iba ibang kemikal sa mga kinakakan ta.

Sa pag mati ko, sa rikas kan panahon asin sa pag dakul kan populasyon sa kinaban puro na lang pag kwakwartahan an nasa isip kan mga negosyante sa bulong asin kakanon. Dapat siguro imbistigahan ining marhay ta dae ta aram kun ano an mga ingridiente sa mga bulong ta. Ika duwa, dakul na mga hilang an nakukua sa mga kakanon na kun saen saen harale. An sabi ngani ninda may mga kakanon na ngunian na lalong kinakakan mo, mas magugutom ka pa imbes na mabasog.