NBI clearance satellite processing center sa Partido bukas na

Ni Sonny Malate

San Jose, Camarines Sur --- Formal nang bukas sa pagserbi sa publico an San Jose Partido NBI Clearance Satellite Processing Center pakatapos kan inauguration asin  blessing kaini kan nagtalikod na semana.

An ceremonya pig-atendiran kan mga haralangkaw na representantes kan National Bureau of Investigation (NBI) Regional asin Provincial Office,  oficiales local, department heads, line agency representatives, barangay officials asin iba pa.

Si Alkalde Jerold B. Peña iyo an nagmaigot tanganing maiharani an serbisyo kan satellite office  sa mga residentes bako sana kan saiyang banwa kundi pati kan iba pang localidad sa bilog na Partido Area.  

Nanotaran ni Peña na dakolang menos gastos sa lado kan mga constituentes sa cuatro distrito an pagkakaigua nin sanga kan  mga oficina  de gobyerno mismo sa mga banwaan digdi. Ini dakolaon na bentahe sa mga harayong  lugar orug na sa mga coastal areas.

On-line an transaction sa NBI satellite office. Ini pinapamahalaan kan sarong personahe gikan sa oficina provincial kaini. An local na gobyerno kan San  Jose Partido an nagtaltag man nin apat na back-up staff para sa mga cliente digdi.

Tanganing maging madalahay asin facil an transaction, an oficina nagpautob nin mga panundon dapit sa mga requisitos sa pagkua nin NBI Clearance. Igua man sindang Facebook Page- an “San Jose Partido NBI Clearance Satellite Processing Center” para masimbagan an kahapotan kan mga cliente.

Mientrastanto, sa pakikiatubang ni Alkalde Peña sa mga taga Media, sinabi niya na sa orug na madaling panahon magkakaigua naman nin oficina an Pag-IBIG Mutual Development Fund (Pag-IBIG) sa saiyang banwa. Enot pa kaini, an Social Security System (SSS) an nagbukas na kan branch office kaini sa San Jose Partido.

Siring man, pigbuyagyag ni Peña na magkakaigua na nin bagong mercado an saiyang banwa. Ini an marerealizar sa paagi kan pakikipagtabangan kan sarong pribadong investor na nahihiling an potential kan San Jose Partido pasiring sa pagiging sarong progresibong lugar.

Magigiromdomdoman na pira sanang aldaw pakabukas kan oficina kan NBI satellite office, ginibo man an groundbreaking kan ipapadugtok na bagong slaughterhouse sa kaparehong banwa.

An modernong bunoan may fundong P52M gikan sa Philippine Rural Development Project (PRDP) kan Departamento de Agricultural asin LGU San Jose Partido. An bagong bunoan karibay kan presenteng  luma asin sadit na slaughterhouse. 

Segun ki Peña,  ini clasificadong Double  A standard, mahiwas, malinig asin may de calidad na serbisyo para sa mga animal raisers, meat vendors asin consumidores.

Piglalaoman kan alkalde na an pagkakaigua nin modernong bunoan mabusol kan sarong pusog na economic enterprise na piglalapigotan niyang masusteniran para sa kauswagan kan banwaan.

NBI clearance satellite processing center San Jose Partido (Photo - San Jose LGU)