NCIP vs LGU Goa conflicto sa daga kan IPs dae pa nareresolberan

Ni Sonny Malate

Goa, Camarines Sur  --- Dae pa nareresolberan an isyu dapit sa tamang sukol kan sakop na daga na pagrurogaring kan tribung Agta Tabangnon digdi. 

Segun ki Basil Cesar  S. Camba, pamayo kan Community Environment and Natural Resources Office (CENRO) pakatapos kan pagharampangan kan ambos lados kan mga enot na bulan, mayo pang nahaman na final na decision manongod kaini. 

An grupo kan Agta Tabangnon na nasa irarom kan National Commission on Indigenous Peoples (NCIP) pinapamayohan ni Indigenous Peoples Mandatory Representative  (IPMR) Rafael Belleza sa Sangguniang Bayan, mantenido sa saindang tindog na an tamang sukol kan daga para sa Indigenous Peoples (IPs) nasa 13,388 hectarias.

Sa ibong na lado, an LGU kan Goa nag-aasertar man na an daga  kan tribung Agta  Tabangnon nasa 9,288 hectarias sana. An total na land area kan Goa nasa 20,288 hectarias.

An ginibong survey kan pig-aakong daga kan IPs na pig-initiar soboot kan NCIP sana ginibo kan panahon kan Covid-19 Pandemic. Segun mismo sa Oficina kan Municipal Assessor digdi ini dae nag-agi sa tamang proceso mantang mayong representante an LGU kan ini ginibo.

Katakod kaini, pigbuyagyag ni Camba na sa presente may mga daga man kan Goa asin  duwang kataid na banwa kaini na may isyu dapit sa boundary kaini. 

Nagpahayag si Camba na maninigong madeterminaran an totoong land area kan teritoryo kan IPs  para sa kapakanan kan IPs asin namamanwaan kan Goa. 

Dinagdag pa kan pamayo kan CENRO na kun masunod an tindog kan IPs apektado an zoning, housing, land use asin revenue generation kan LGU. An Goa saro nang 1st class municipality asin agresibo an  campanya para madagdagan an ingreso kan municipio.

Sa Sangguniang Bayan kan Goa, an Chair kan Committee on Housing and Land Use, si Konsehala Ruby P. Pan, pursigido na mapatama an tamanyo kan daga para sa karahayan kan kagabsan.

Apwera kaini, maliligis man an mga privadong residentes na iguang pagrurogaring sa laog kan  cuestionableng  teritoryo. An tribung Agta Tabangnon nag-eerok sa 12ng barangay sa Goa.

Dagdag pa kaini, apektado pa an mga residentes na naggawgawan na nin Certificate of Land Ownership Award (CLOA) kan Department of Agrarian Reform (DAR).

Katakod kan isyung ini, si Camba nagpahayag na an ambos lados parehong may pasangkalan na kakosgan sa irarom kan ley. Siya nagtutubod na mareresolberan an isyu sa paagi kan pag-itaas kaini sa tamang ahencia kan gobyerno o Corte.