top of page

NCPM, Anom Na Eskalon



Sa Kantong Putikon, haloy nang pinag oorolayan an magayon na futuro kan Ciudad nin Naga. Sa Kantong Putikon, na an mga para kape, iyo an mga personalidad sa Media asin Peryodiko, mga retiradong empleado kan gobyerno asin mga ordinaryong Naguenio na mahilig sa irestoryahan maging tsimis man. An mga tema na parating pinag oorolayan sa Kantong Putikon iyo siempre an pulitika sa kabikolan. Sa provincia nin Camarines Sur, naglalataw an mga familya nin Villafuerte, Fuentebella, Alfelor, Andaya, asin saro pinag oorolayan iyo an familya de Lima. Si dating Senadora Laila de Lima na nakaluwas na sa presohan, iyo daa ngonian an makusogon na personalidad na puedeng magsabat sa mga Villafuerte ta siya puedeng magdalagan Congresswoman sa Rinconada asin iguang kapasidad na labanan si Migz. Si Laila de Lima an mahamot an pangaran na puedeng labanan si Governor Luigi ta si Laila mas mahamot an pangaran keysa ki Leni. Sa Ciudad nin Naga, daing ontok an debate sa Kantong Putikon, kun siisay man nanggad an manggagana komo Alkalde sa tahaw ninda Legacion asin Leni. Sa kuentada kan Kantong Putikon, Si Legacion preparado na atubangon si Atty Leni Robredo sa pagka alcalde sa Ciudad nin Naga. Mayo daang mawawara kun si Mayor daogon ni Madam Leni, alagad mas dakulang historya kun ang Madam, daogon si Mayor Legacion, iyo iyan an punto na matatapos na an enfluencia kan Robredo sa Ciudad Nin Naga. Risado an kumbinasyon kan pulitika sa Naga. Si Atty Leni, dai puedeng mag ngirit ngirit ta kunwari sana an pag hoyom hoyom ni Mayor ta maabot an aldao, matipon nin fuerza an Alkalde asin iyo an isasabat sa dating Bise Presidente. An sabi sa Kantong Putikon, kaya kan Alkalde an garastusan sa Eleksyon ta baka dai mag butas nin gastusan an saiyang kalaban. Sa tahaw kan orolay pulitika sa kantong putikon, sarong dating Engineer kan DPWH sa persona ni Engr. Louie Zamudio an nagdeklara, na an Ciudad nin Naga, puedeng ihambing sa Hongkong o Singapore pag abot kan Aldao ta iyo saodan o NCPM, magiging anom na eskalon. Haloy na palan pig desinyo ni Engr. Zamudio na ang NCPM maging pinaka modernong saodan sa Asya. Iyo ini an maresolber kan goromok na trafiko sa Naga, iyo ini an maresolber kan parkingan sa Centro. An plano iyo na totalmenteng idemolish an NCPM, asin tutugdokan nin modernong anom na eskalon na kumpleto sa elevator asin eskalon na ang gabos na parte malinig asin malipot. An mga parasaod, naka ngiririt ta sinda malunad sa halakbang na escalator asin dakulang elevator. An first and ground floor iyo an Pay Parking tanganing an mga awto sa Centro, igua nin modernong parkingan, asin 3rd floor abot sa 6th floor iyo an market. Bako ining imposible kun an maging alcalde kan naga igua nin inaapod na Political Will na nagmamawot na an Naga City, maging sarong pinaka modernong Ciudad sa Asya.

Comments


bottom of page