NCPM dapat nakaalerto contra sa bandalismo

An Committee on Market Affair sa Sangguniang Panlungsod kan Ciudad nin Naga nangapudan na sa manijamiento kan Naga City People’s Mall (NCPM) na maging marikmat an saindang market guards asin dapat 24/7 an saindang pagpatrolia sa mahiwas na mercado nganing magkadarakop na an envuelto sa bandalismo.

Nakaabot na an sombong ki Consejal Vidal Castillo, chairman kan sinambit na komite na nagdadakul an mga nangyayaring spray painting sa edificio kan NCPM na pigtutubodan matanggang banggui ginigibo kan mga pasaway na jovenes.

Sinabi ni Castillo igwang mga nakadestinong market guards na dapat regular an pagpatrolya orog na kun matangang banggui na digdi ginigibo an pagpasaway kan suspechadong jovenes.

Dapat igwa nang madakop an mga guardiya nganing pamultahon asin casohan base sa ordinansa kan City Hall, sabi pa kan consejal.

Kabale sa rekomendasyon kan komite kun kulang an nakawarak na CCTV camera dapat dugangan nganing mabidbid na an responsable sa bandalismo sa pinturadong mercado.

Sa lado ni Ramon Florendo, namamahala kan NCPM kinakaipuhan dagdagan nin CCTV camera an palibot kan mercado alagad sa inisyal nindang inbestigasyon nagluluwas na mga jovenes an envuelto.

Grupo nin gang o organisasyon nin jovenes an suspechado huli ta igwang mensaje an saindang kinukurit gamit an spray painting.

Nareparo pa ni Castillo na bako lang an edificio kan NCPM an kinukuritan nin mga pasaway envez maging sa iba pang mga kudal maging propriedad pribado asin pampublico.

Nangapudan man an consejal na bako lang market guards an dapat magpatrolia asin madakop an mga suspechado envez dapat mag-aksyon man an Naga City Police Office.

An pighahaditan digdi kun pati na mga pribadong vehiculo na naka-garaje iyo naman an biktimahon. (dpa)