NCPO igua nang 1,610 na PNP augmentation force

Nagseguro an Camarines Sur PNP Provincial Office sa Naga City Police Office na andam na an saindang 360 miembros kan PNP na ipapadara sa Ciudad nin Naga bilang augmentation force.

Igua nang total na 1,610 na augmentation force sa ciudad mantang 1,250 an ipapadara hale sa Bicol PNP na pigseguro ni regional director BGen. Andre Dizon.

An NCPO igua nang dating 800 na kapupulisan yaon pa an suporta kan miembros kan Public Safety Office kan City Hall.

Si P/Col. Virgilio Olalia, Provincial Director kan PPO Camarines Sur nagpahayag na an saindang pagpadara nin augmentation force sa NCPO para sa maabot na Peñafrancia fiesta nganing maging katuwang sa pagmantenir kan paz y orden asin sa bulos kan trafico huli ta ribo-ribong devotos ni Nuestra Senora de Peñafrancia an masungko sa ciudad maging paghibog kan malaog sa ciudad na mga vehiculos hale sa manlaen-laen na ciudad asin provincial.

Kan 2023 Peñafrancia fiesta 1,500 an pinadarang augmentation kan Bicol PNP alagad ngunian na taon binaba sa 1,250 huli ta igua nang dating 800 na kapupulisan an ciudad saka igua pang hale sa PPO Camarines Sur.