NCPO liwat maestricto vs mga sutil sa ley trafico

Naging tugak ngona an mga traffic enforcers kan Naga City Police Office (NCPO) huli kan nangyaring calamidad asin clearing operation sa kasentrohan kan ciudad asin barangay alagad liwat estrictong ma-implementar an mga awtoridad kan mga ley trafico.

Si Lt. Col. Chester Pomar parapahayag kan NCPO nagsabi nag-aandam giraray sinda nganing ibuelta an pagpasunod kan mga traffic ordinance na kabale digdi an wheel clamp, double parking, mayong helmet, mayong licensiya sa pagmanijo asin iba pa.

Sa liderato ni City Director Col. Erwin Rebellion, saiyang pigponan an one time big time operations alagad naglaylo an traffic enforcers sa tahaw kan nangyaring calamidad.

Nagbabalik naman si ibang mga pasaway na tsuper na dawa sain nagaraje kan saindang vehiculo apesar nakalaog sa wheel clamp area asin double parking asin iba pa alagad sa dai mahahaloy mabuelta an mga awtoridad nganing darakopon asin ma-isyuhan nin ticket sa pagbalga kan ley trafico.

Naging tugak an NCPO sa implementasyon kan leyes trafico mantang dawa saen na kanto tambak an basura alagad oras na malinig na an kasentrohan liwat ma-aksyon an traffic enforcers.

Piglalaoman na masabay man an Public Safety Office kan City Hall na kabale na saindang pig-iimplementar iyo an wheel clamp ordinance.