NCPO nagdeclara nang full alert para sa Festividad ni Ina

Sa tahaw kan nagdadakul na an mga nagruroso na mga devotos ni Nuestra Señora de Peñafrancia, an Naga City Police Office (NCPO) nagdeclara na nin full-alert poon ngunian na semana.

Katuyohan kaini nganing maseguro an pagmantenir kan paz y orden sa bilog na celebrasyon kan Festividad ni Ina, sabi ni PSMS Tobias Bongon, an opisyal na parataram kan NCPO.

Huli kaini, dai ngona tinutogan an pagbakasyon sa duty afuera sana kan saindang ‘‘regular na day-off’’

Nagseguro naman nin maabot sa 1,200 na kapupulisan na augmentation force an Camp Simeon Ola tanganing maging katuwang kan NCPO sa pagmantenir kan paz orden mantang ribo-ribo nang mga bisita an ciudad.

Igwa man nin augmentation force na ipapadara an 9th Infantry Division kan Philippine Army hali sa Camp Elias Angeles, San Jose, Pili, Camarines Sur.

Naga City Police Office nasa full alert sa panahon kan celebrasyon kan kafiestahan ni Ina. (NCPO)

Alagad piglinaw kan NCPO na limitado na an aldaw kan augmentation force sa ciudad asin magiging presente sana digdi sa mga aldaw kan mga actividades kan simbahan siring kan traslascion asin fluvial procession ki Ina.

Sa lado kan actividad kan lokal na gobierno siring kan military parade asin civic parade madestino nin 400 na kapupulisan.

Sinabi pa ni Bongon nin huli ta pag mayo nang actividades an simbahan asin City Hall sayang kan oras kan augmentation force mantang yaon sana sinda sa billeting center.

An mangyayari pakatapos kan actividad mabalik sa saindang destino asin mabuelta kun igwa nang sunod na actividad nganing sinda makatuwang sa pagmantenir kan paz y orden.

Mientras tanto, estrictong iimplementar kan NCPO iyo an Comelec gun ban mantang nag-epektivo na an election period para sa pirilian sa Barangay asin Sangguniang Kabataan sa Oktubre 30, 2023.