NCPO naka full alert

Nasa full alert na ngunian na panahon nin Pasko an Naga City Police Office (NCPO) nganing macierto an matuninong na paz y orden sa Ciudad nin Naga mantang poon kan Deciembre 15, 2024 dai na ngona tinutugot an pagbakasyon afuera sana kun iguang emerhencia.

Si Deputy City Director for Administration Lt. Col. Darius Sola nagpahayag na nagwarak na sinda nin kapupulisan sa mga estratihicong lugar orog na sa pagpoon kan Misa de Aguinaldo kan Deciembre 16 na nagdestino nin mga pulis sa cada simbahan.

Pigseguro kan NCPO an police visibility sa tahaw kan dakul an mga nagbabarakasyon sa trabajo kaipuhan bilang parte kan saindang kampanya sa crime prevention bako lang sa mga sentro komersyal asin ibang barangay kabale na digdi an pagsabat kan Pasko asin Bagong Taon.

An mga lugar na dapat iguang mga pulis iyo an simbahan, sa mga sentro kan ciudad, bus terminal asin jeepney terminals, asin iba pang matawong lugar.

Nagpatanid man si Sola sa mga ilegal na matienda nin rebentador na dadarakopon asin malalaom pa sa carcel asin maatubang nin caso sa corte.

Pig-alerto na nin amay an task force paputok mantang limitado sana an tatawan nin permit na puedeng magtienda harani sa Naga river. Alagad antes ma-isyuhan nin permit kan City Hall maatendir ngona sa seminar.

Mientras tanto, sa ginibong staff conference sa Camp Semion Ola sa Ciudad nin Legazpi, si Regional Director BGen Andre Dizon nag-orden sa Albay asin Camarines Sur PNP Provincial Command na magpadara nin augmentation force sa Naga City Police Office asin Legazpi City Police Station sa tahaw kan ribo-ribong nagdagsang nagpurolian asin iba pang mga actividades dapat madagdagan nin elementos kan kapupulisan nganing maseguro an paz orden sa mga lugar na dakul an mga tawo kabale na sa mga simbahan huli kan Misa de Aguinaldo na nagpoon kan Deciembre 16.

An orden kan Bicol PNP na dapat maheling kan mga tawo an police visibility nganing sinda maprotihiran sa ano man na mangyayaring kriminalidad asin crime prevention.

Sa PPO Camarines Sur, si Provincial Director Virgilio Olalia Jr. nagpaluwas nin directiva sa gabos na mga Chief of Police na segurohon iguang mga nakadestinong mga pulis sa simbahan.

Nganing dai magkulang kulang an personajes kan PNP, prohibido an pagbakasyon ngunian na panahon nin Pasko poon kan Deciembre 15 alagad kun iguang emerhencia puedeng tugotan.