top of page

NCPO nakaandam sa homa nin pambobomba

Dawa mayong nangyayaring insidente nin pambobomba sa Ciudad nin Naga alagad an Naga City Police Office nag-aandam kan saindang seguridad sa mga school universities.


Si City Director Col. Nelson Pacalso, City Director kan NCPO nag-atubang sa press conference kan Lunes, Deciembre 4 nagpahayag na kabali sa saindang misyon iyo an gigibohon na coordinasyon sa security forces sa mga colegio para sa proteksyon kan estudiantes asin propriedad kan escuelahan.


Saindang tutukdoan an mga security guard laban sa ano man na posibilidad na puedeng gibohon kan terorista sa laog kan school compound.


An pahayag na ini kan NCPO kasunod kan nangyaring pagpasabog nin bomba sa laog kan laguerta kan Mindanao State University sa Ciudad nin Marawi kan Domingo, Deciembre 3, 2023 na kun haen apat an kinumfirmar kan PNP na binawian nin buhay saka 50 mga iredo.


An insidente nangyari mantang nagkakaigwa nin misa sa gymnasium kan Universidad.


Magiging higot an intelligence monitoring kan mga awtoridad nganing parating alerto laban sa ano man na homa sa seguridad.


Hagad kan NCPO an cooperasyon kan lambang indibidwal na kun igwang maheling na makaduda sa seguridad i-osip tolos sa pinakaharaning Police Station.


An pagpaseguro kan pulisiya kan ciudad bilang proteksyon sa mga estudiantes nganing malikayan an ano man na homa sa publico.


Sa press conference pinahayag na ngunian na panahon nin Pasko madagdag sinda nin kapupulisan sa mga terminal, simbahan magin sa iba pang mga matatawong lugar.


Igwa nang mga pig-andam an NCPO asin manijamiento kan Central Bus Terminal sa mga nag-aarabotan na pasajeros na mapuli sa saindang familia nganing magbakasyon.

Comments


bottom of page