NEA ADMINISTRATOR HINALE: Duterte pinaboran an reclamo kan Casureco 1 vs Masongsong

Pinatumba sa puesto kan general manager kan Camarines Sur I Electric Cooperative (Casureco l) asin presidente kan junta direktiba kan Central Negros Electric Cooperative (Ceneco), si Edgardo Masongsong, na sarong presidential appointee bilang administrator kan National Electrification Administration (NEA) sa casong grave misconduct na sinangat sa Presidential Anti-Corruption Commission (PACC).

Si Presidente Rodrigo Duterte iyo mismo an nag-anunciar sa national television broadcast kan Agosto 21, 2021 na saiyang inaprubaran an rekomendasyon kan PACC matapos maprubaran nagkasala sa casong Grave Misconduct na an castigo ‘‘dismissal from the service,’’ asin dagos nang kinakancelar an saiyang eligibility, asin hinalean kan saiyang gabos na benepisyo sa pagretiro sagcod ‘‘perpetual disqualification from holding public office’’. Ini base sa Seksyon 57 (a) kan 2017 Rules on Administrative Cases in the Civil Service.


Sa awtorisasyon kan Presidente pinirmahan ni Executive Secretary Salvador Medialdea an desisyon kan Agosto 20, 2021 asin nagderihir sa PACC na darahon an caso sa Office of the Ombudsman sa maninigong pagsangat pa nin caso kriminal kontra sa respondiente Edgardo Masongsong.


An mga complainants sa caso iyo sinda Casureco I General Manager Ana Sylvia Mirando Alsisto asin Ceneco board President Roy Marfil Cordova sa Admin Case No. MP-0005-2019.

An caso kontra sa NEA administrator segun sa desisyon huli kan saiyang pag-aprubar kan mga board resolutions kan mga electric cooperatives (ECs) na nag-aawtorisar na magtaong kontribusyon nin fondo para sa pagkampanya kan Philippine Rural Electric Cooperatives Association (PHILRECA) bilang party-list candidate asin aktibong magkampanya sa sinambit na party-list durante sa ginibong 2019 eleksyon nasyonal.


Si Masongsong haling Mindanao asin dating congresista antes nag-asumir sa puesto bilang NEA administrator kan Noviembre 21, 2016.


An nagreclamong general manager nakapresentar kan saiyang mga evidencia siring kan dokumentos sa pag-deposito sa bangko sa ngaran kan party-list na an cuarta hali sa kontribusyon kan mga ECs.


An general manager kan Casureco I nagsayumang magtao nin campaign contributions sa pagtubod niya na ilegal an paggamit kan cuarta kan cooperativa.


Base pa sa dokumento kan desisyon sa sinambit na caso an mga cooperativa nin electricidad nakatao nin total na cantidad P14,860,638.00 sa account kan PHILRECA bilang kontribusyon sa kampanya durante kan 2019 national elections.

Si Masongsong kan Hulyo 25, 2019 nagpadara kan saiyang kasimbagan sa reclamo kontra sa saiya asin saiyang pinapahimotikan.


Saiya pang sinabi na an kontribusyon kan ECs sa Philreca bako para sa katuyohan pulitikal mantang an ECs regular na nagpapadara nin fondo sa Philreca enporma sa membership dues o advocacy funds. (dpa)