NFA Albay nagpapabakal na nin ‘‘Benteng Bigas’’

An Ciudad nin Legazpi sa provincia kan Albay iyo pa sana digdi sa Bicol iguang programa kan P20 ‘‘Benteng Bigas’’ ni Presidente Ferdinand Marcos Jr. mantang naghahalat man an ibang provincia kan rehiyon Bicol kun nuarin sinda makikinabang kan pangako hababang presyo nin bagas.

Alagad kabale sana sa mga benipisyaryo kan baratong presyo kan bagas iyo an mga empleados sa pribadong sektor na nagrerecibe nin minimum wage asin limitado sana sa diez kilo an pinapabakal sa lambang empleado.

Pigcierto ni Assistant Regional Manager Julia Llenaresas kan National Food Authority na bastante an saindang suplay nin bagas nganing dagos-dagos an pagpabakal kan P20 cada kilo .

Tambak an mga stock nin paroy sa mga bodega kan NFA sa mga provincia kan rehiyon mantang nagpapadagos an saindang palay procurement sa presyong Php24 cada kilo.

Padagos an saindang pagpamolino nganing perming preparado na bastante an suplay sa mga pinapabakal na NFA rice.

Sa Camarines Sur na tambobong nin paroy sa rehiyon, sinabi ni OIC Provincial Manager Marbin Malabanan na pano-pano an saindang bodega alagad naghahalat sinda nin direktiba hale sa secretary kan Department of Agriculture kun nuarin mapoon kan P20.00 ‘‘benteng bigas’’.

An NFA Camarines Sur nagsusuplay nin bagas sa ibang provincia siring kan Sorsogon maging sa ibang rehiyon nganing makatabang sa kakulangan nin suplay.

An baratong presyo kan bagas saro sa pigpangako ni Marcos kan siya nagkakampanya sa eleksyon bilang presidente alagad an masuplay kan bagas hale sa NFA bako sa pribadong negosyante.

Sa lado kan paraoma padagos nagrereclamo huli ta barato an kilo kan paroy na cantidad sanang P12 sa mga pribadong kumprada.

Padagos nindang kinokondenar an Rice Tariffication Law na iyo an causa sa pagbagsak kan presyo kan saindang inaaning paroy.