top of page

NFA Bicol abonda sa stock nin bagas

Ciudad nin Legazpi --- Iginilid kan National Food Authority (NFA) an posibleng pagkulang nin stock nin bagas sa mga bodega sa Bicol mantang hababa an produksyon kan paroy huli ta panahon nin tag-init.


Pigseguro kan NFA na suficiente an saindang stock nin bagas sa tahaw kan halangkaw na saindang palay procurement, dakulang tabang pa an subsidiya kan LGU Camarines Norte sa NFA sa presyo kan saindang tinutongod na paroy sa mga paraoma.


Si Jaharah R. Pavilando, regional information officer kan ahencia nagpahayag sa entrevista kan Bicol Mail na sa saindang pinakahuring inbentaryo igwa pang 79,119 sakong bagas asin 44,108 sakong paroy mantang igwa pang maabot na diez mil na sakong paroy na binakal kan ahencia sa lindong kan ‘‘palay procurement program’’.


Dakul pang mga paraoma na nag-aarani nin paroy na saindang binabagsak sa mga bodega kan ahencia.


Nagsusuplay pa an ahencia sa mga Kadiwa Center nin NFA rice nganing ipabakal sa baratong presyo.


Sa koordinasyon sa barangay asin LGU nagbugtak sinda nin mga Buying Stations nganing maparani an ahencia sa paraoma na mapabakal kan saindang paroy.


Sa mga nagpapatungod nin paroy sa ahencia igwang insentivo nganing maging miembro kan Registry System for Basic in Agriculture (RSBSA) na kun haen igwang nakukuang ayuda sa Department of Agriculture (DA) asin insentivo sa transportasyon.


Dawa nagkaigwa nin bagyong Amang dai apektado an saindang stock mantang 200 sanang sakong bagas an saindang ‘‘withdrawal’’ sa Matnog, Sorsogon.


Base sa DA Bicol dawa igwang P8 milyones na destroso sa tanuman nin paroy huli kan bagyong Amang alagad dai man apektado an halangkaw na produksyon nin paroy. An dahilan maabot sana sa 1,017 hektaryas na tanuman paroy an nadestroso kan tubig baha na kun hehelingon sa datus nasa 0.74 por ciento sa 137,400 hektarya na tanuman paroy sa Kabikolan.


Dahilan kaini, an DA nagsabi na dai matikapo sa suplay nin bagas an satong rehiyon. (DPAureus)

Commenti


bottom of page