top of page

NFA CamNorte nagbabakal P24.00 cada kilo nin paroy

An National Food Authority (NFA) sa Camarines Norte iyo sana an unikong provincia sa Bicol na nagbabakal kan paroy nin paraoma sa halangkaw na presyo na nagcacantidad na nin P24.00 cada kilo hale sa dating P19.00 na mas halangkaw sa pribadong kumprador na P21.00.


Nangyari ini huli sa suporta kan lokal na gobierno kan Camarines Norte sa pamamayo ni Gobernador Ricarte ‘‘Dong’’ Padilla na nagpoon pa kan Enero 2023.


Si Jaharah R. Pavilando, regional information officer nagpahayag sa Bicol Mail maabot sa P3.3 milyon an pinabulosan na alokasyon kan gobierno provincial sa NFA nganing dagdagan an presyo kan paroy na binabakal kan ahencia sa mga paraoma.


An LGU Camarines Norte asin NFA nagpermahan sa memorandum of agreement kan Enero 12, 2023 nganing magpaluwas nin fondo para dugang na P5.00 cada kilo kan paroy sa lindong kan ‘‘palay procurement program’’ .


An mga paraoma sa sinambit na provincia nagrereclamo sa hababang presyo kan NFA na mas halangkaw pa sa pribadong kumprador na nagcacantidad nin P21.00 alagad pinagmarhay kan LGU Camarines Norte dugangan nin fondo an ahencia nganing bakalon sa halangkaw na presyo an paroy kan mga paraoma.


An programang ini kan LGU Camarines Norte dakulang bagay nganing maglangkaw an stock nin bagas kan ahencia para sa food security, sabi pa kan NFA Bicol.


An NFA Camarines Norte asin NFA Camarines Sur pigsaro na sanang sanga bako na si dating suhay na provincia epekto kan Rice Tarrification Law kan panahon ni dating Presidente Rodrigo Duterte.


Dawa saro na sanang branch an ahencia sa duwang provincia nganing mayong cuestion sa Commission on Audit an paroy sana kan paraoma sa Camarines Norte iyo an binabakal na P24.00/kilo.


Alagad sinabi pa ni Pavilando na nagsumiter na sinda nin kaparejong propuesto sa Camarines Sur asin hinahahalat na sana kun mapabor si Gobernador Luigi Villafuerte. (DPAureus)

Comments


bottom of page