NFA CamSur-CamNorte abunda sa suplay nin bagas

Nagseguro an National Food Authority (NFA) Camarines Sur-Camarines Norte na abunda an suplay nin bagas mantang nagsobra sa pigtalaan na procurement target an nabakal kan ahencia kasunod kan inabot sa 49,880 sakong paroy matapos kan aranihan ngunian na saguli o kan bulan nin Hunyo 2026.

Segun sa ahencia sa paagi kan saindang Assistant Branch Manager Edgar Gadbilao, inabot nin sa 286.78 por ciento sa bulanan na target na 17,40 sako nin paroy an saindang nakabakal gikan sa mga paraoma.

An halangkaw na presyo nin paroy kan NFA kumpara sa mga kumprada nakatabang nganing an mga farmers’ cooperative association asin iba pang grupo sainda na magpatungod nin paroy.

Afuera pa kaini, yaon pa an suporta kan Department of Agriculture sa paagi nin libreng banhi asin abuno.

An NFA CamSur-CamNorte pigsaro na sanang sanga mantang an saindang opisina yaon sa Barangay Palestina, Pili, Camarines Sur.

Huli kan abundang suplay nin bagas sa duwang provincias dakulang bagay nganing awad-awad an saindang pwedeng ipabakal sa mga lokal na gobierno, DSWD asin iba pa kun panahon nin calamidad.

An Camarines Sur iyo an may halangkaw na produksyon nin bagas sa Rehiyon Bicol mantang mahiwas an omahan digdi.

Sa ngunian an pig-aandaman naman kan mga paraoma iyo an panahon nin sibagat na panahon nin tag-uran na iyo an saindang problema kun may calamidad.