NFA CSur nagpapabakal nang ‘‘Benteng Bigas’’

Nagsikad na sa sanga kan opisina provincial kan National Food Authority (NFA) sa Camarines Sur an pagpabakal kan ‘‘Benteng Bigas’’, sarong programa kan administrasyon ni Presidente Ferdinand Marcos Jr. na magpabakal nin baratong presyo nin bagas sa cantidad na P20 cada kilo, alagad sa ngunian limitado an pwede ngonang magbakal iyo an mga paraoma na na nasa listahan kan Registry System for Basic Sectors in Agriculture (RSBSA).

Nagpoon an pagpabakal kan P20 na kilo nin bagas kan Agosto 28, 2025 sa sanga kan opisina provincial kan NFA CSur sa banwaan nin Pili na nasa pamamahala kan Food Terminal Inc (FTI).

Sa entrevista kan Bicol Mail ki Julie Jarbeña, opisyal na parataram kan ahencia limitado sana sa diez kilo an pinapabakal kan FTI sa cada paraoma alagad nganing dai na magbalik-balik pwede makabakal nin sarong sako sundo na sa Deciembre 31, 2025.

Huri nang naka-implementar an ahencia sa P20 Rice Program mantang naghahalat sana sinda kan directiva hale sa saindang opisina sentral. Sa Albay perang bulan na an nakakaagi padagos an saindang ‘‘Benteng Bigas’’ kabale na sa tinutugotan na makabakal iyo an mga empleado na nagrerecibe sana sueldo base sa minimum wage law.

Pwede mang gibohon digdi sa Camarines Sur kaipuhan sana nin aplikasyon sa Department of Labor an private employer.

Dinagdag pa ni Jarbeña huli sa Rice Tariffication Law dai na sinda awtorisado na magpabakal nin bagas sa mga mercado publico envez sa mga lokal na gobierno orog na kun iguang calamidad.

An sektor nin paraoma haloy nang naghuhurot sa gobierno na ibasura na an RTL mantang ini an nakakaapektar sa saindang hanap buhay huli ta hababa an presyo kan saindang pinapabakal na paroy sa mga kumprada mala ngani sa ngunian cantidad na sanang Php10 hasta Php12 cada kilo. Napaboran kan ley iyo an mga darakulang negosyante.