NFA dai titikapohon sa suplay nin bagas

Dawa palawigon kan Department of Agriculture an Memorandum Circular No. 3 na nagdedeclara nin Food Emergency for Rice dai titikapohon sa suplay nin bagas an National Food Authority sa mga lokal na gobierno mantang nagtataranuman na nin paroy an mga paraoma asin sa bulan nin Mayo 2025 panahon naman nin aranihan.

An Memo na pig-isyu kan Febrero 3, 2025 alagad kun palawigon ini kan DA igua pa sindang suficienteng stock nin bagas.

Nagpapadagos pa sinda sa palay procurement na mas matambak an saindang tinutongod na paroy sa mga paraoma sa aranihan mientras na sa aroaldaw inaabot sa 6,000 na sakong bagas an saindang nababakal.

Sa entrevista kan Bicol Mail ki OIC Branch Manager Marbin Malabanan kan NFA Camarines Sur-Camarines Norte, sinabi kaini base sa orden kan DA central Office dapat magpaluwas sinda nin stock nin bagas nganing isuplay sa mga lokal na gobierno na iyo an mapabakal kan baratong presyo kan NFA rice na nagcacantidad nin Php28 hasta Php35 cada kilo kumpara sa mga mercado na nagdadalagan an presyo poon sa Php50 hasta Php65.

An bodega kan NFA Camarines Sur iguang stock nin 328,631 cavan nin paroy asin kun momolinohon abot pa sa 232,532 cavan nin bagas.

Sa memo circular kan DA an food security emergency magpapadagos na iimplementar alagad dapat ma-review giraray cada ika-apat na bulan.

An gobierno provincial kan Camarines Sur iyo an mabakal kan 25 mil na cavan nin bagas sa paagi kan Memorandum of Understanding sa Food Terminal Inc. na babayadan nin P47.5-M mantang an NFA iyo an mapaluwas kan suplay nin bagas nganing idistrubuer sa mga municipalidades na ipapabakal sa cantidad na P33.00 cada kilo.