NFA kumpetensyado sa presyo kan paroy
Ciudad nin Legazpi --- Apektado an palay procurement program kan National Food Authority (NFA) huli sa kumpetisyon sa barakalan nin paroy kan mga paraoma sa Albay, mientras nagpapalangkaw nin presyo an mga pribadong kumprador sa nakapakong presyo kan NFA na cantidad P19.00 cada kilo alagad an negosyante kayang magpresyo nin P19.50 hasta P20.00.
Mala ngani si target na dapat mabakal sa mga paraoma na cincuenta mil na sakong paroy ngunian na Abril 2022 maabot palang sa diez por ciento an nababakal kan ahencia, sabi ni Branch Manager Domingo Pura kan NFA sa Ciudad nin Legazpi.
Magin sa presyo kan bagong ani nin paroy kun P15.00 cada kilo sainda alagad sinasabayan man kan pribadong kumprador.
Kun dati panahon nin aranihan nabagsak an presyo cada kilo alagad ngunian nagkakaigwa na sinda nin kumpetisyon sa presyo.
An NFA nakadepende an saindang pagbakal paroy sa alokasyon kan gobierno nasyonal para sa palay procurement program mientras na dai sinda awtorisado na langkawan an dating presyo na P19.00 cada kilo.
Alagad sa lado nin sektor nin paraoma paborable sa sainda huli ta dai nakakabuelo magbagsak kan presyo nin paroy an mga pribadong kumprador bakong arog sa ibang provincia inaabot na sana nin P11.00 hasta P12.00 an presyo.
Sa ngunian igwa pa sana sindang 27 mil na sakong stock nin bagas mantang 25 mil na paroy.
Dai na sinda puedeng magsuplay nin NFA rice sa mga mercado huli ta prohibido na sa Rice Tariffication Law na nagiging dahilan sa halangkaw na presyo kan bagas sa mercado.
An mga higanteng rice traders iyo na an nagdidikta kan presyo nin bagas sa mercado asin dai narealisar si pangako kan gobierno na kun maimplementar na an tariffication law mababa an presyo kan bagas alagad dai nangyari mala ngani sa ngunian an pinakabaratong presyo P40.00 cada kilo.
An NFA sagcod na sana sa food security an saindang stock nin bagas na pigsusuplay sa DSWD, LGUs asin kun may calamidad.
An tariffication law kan gobierno nagresulta man sa pagkakahaklas kan nasa 50 por cientong mga empleados kan ahencia mantang si iba napiritan na magretiro sa serbisyo dawa dai pa naabot sa mandatory age of retirement.
Pigsaralak na sana sa duwa an dating sarong provincial office, sa Camarines Sur pigsaro na sa Camarines Sur; Sorsogon asin Masbate; Legazpi sa ibang banwaan kan Catanduanes mientras na an Albay si iba man na banwaan kan Catanduanes.(DPAureus)