NFA “no comment” sa pangako gigibohon Php20 kilo kan bagas

Nagsayumang magkomento an National Food Authority (NFA) sa pangako kan presumptive president Ferdinand Marcos Jr. na gigibohon nang Php20 an cada kilo kan bagas alagad halaton na ngona an pagtukaw kan bagong presidente.


Si Domingo Pura, Branch Manager kan NFA Legazpi City-Catanduanes dai na nagtaong reaksyon mantang nagtutubod siya na itutulod kan bagong administrasyon maging kan nagkaperang congresista an nagpapabor na enmiendahan an Rice Tariffication Law na bakong paborable sa mga paraoma envez sa mga higanteng rice traders.


Nagtutubod an branch manager na kun mangyari an pangako kan bagong administrasyon posibleng itao sa NFA an pagpabakal kan baratong presyo nin bagas.


Afuera pa kaini, posibleng ‘‘selected’’ sana an pagpabakal kan NFA rice.


Sa ngunian an NFA rice cantidad Php25 cada kilo mantang Php19.00 an saindang bakal kan paroy sa lindong kan palay procurement program kan ahencia.


An punto an gobierno mayong poder na magdikta sa presyo kan bagas mantang an NFA pinapadalagan kan gobierno.


Sinabi pa na ano man na direktiva o polisiya kan bagong administrasyon an saindang ahencia masunod sana nganing iimplementar.


Sa ngunian an stock kan NFA rice sa irarum kan Rice Tariffication Law nagdedepende sa pangangaipo na sana kan lokal na gobierno, DSWD asin iba pang ahencia orog na kun may calamidad.


Prohibido na sinda na magsuplay sa mga mercado envez an saindang trabajo an pagpadagos kan palay procurement program asin mag-stock nin bagas para sa food security.


Saindang pinapaboran na dapat ma-review giraray an controvercial na Rice Tariffication Law na dai man nakatabang sa sektor nin paraoma huli ta nagparababa si presyo kan paroy.


Hinale na sa sainda an pag-angkat nin imported rice envez tinao na kan RTL sa mga rice traders na iyo na an nagdidikta kan presyo nin bagas sa mga mercado.


An RTL naging epektibo matapos pirmahan ni Presidente Rodrigo Duterte kan Febrero 2019 sa tahaw kan pagcontra kan mga paraoma, NFA asin iba pang sektor. Si Senador Cythia Villar iyo an principal author sa senado kan RTL. (dpa)