NFA rice perming andam kun kaipuhan sa evacuees sa Albay

Ano man na oras na kaipuhan kan LGUs an bagas sa Albay orog na kun may calamidad parating nakaandam an National Food Authority para sa saindang relief operations.

Pigcierto kan NFA Bicol sa paagi kan saindang Assistant Regional Manager Julie Llenaresas na bastante an saindang stock nin bagas sa bodega mala ngani iguang 103,000 na sako nin bagas sa bodega asin labi sa 766,000 na sakong paroy nganing ipamolino, sa tahaw kan abnormalidad kan actividad kan Volcan Mayon na sagcod sa ngunian nasa Alert Level 3.

Sa ngunian an LGUs asin Department of Social Welfare and Development sa rehiyon padagos kan saindang relief operations sa mga evacuees na yaon sa mga escuelahan asin iba pang evacuation center huli ta apektado an saindang mga estaran sa pamitisan kan volcan.

An pagsuplay kan NFA nin bagas sa LGUs orog na kun may calamidad haros iyo na sana an saindang trabaho mantang prohibido na sinda magsuplay sa mga mercado nganing ipabakal sa consumedores.

Alagad nagpapabakal man giraray sinda nin bagas sa lindong kan programa kan DA sa paagi kan ‘‘benteng Bigas, Meron’’ sarong program ni Presidende Ferdinand Marcos Jr. nganing matabangan an sektores na kaipuhan an baratong presyo nin bagas.

Pig-iimplementar na kan NFA alagad sa mga piling provincia asin limitado sa piling sektor.