NGCP nagpatanid dapit sa brownout
Sa atubang kan mainit na panahon an National Grid Corporation of the Philippines (NGCP) nagpaluwas nin patanid sa publico kan pagnipis kan suplay nin kuryente na magiging causa kan biglaan na mga brownout.
Si Nilda Somera, information Officer kan NGCP sa Bicol nagpahayag sa Bicol Mail ngunian na bulan nin Abril 2023 nagpoon na an sobrang init kan panahon mantang bulan na nin summer alagad sa sunod na bulan nin Mayo 2023 dai maiibitaran na mangyari kasunod kan pagnipis man kan power supply huli kan summer months asin yaon na digdi an halangkaw na pangangaipo sa kuryentye.
An Department of Energy nagtutubod na an pagnipis digdi sa Luzon puedeng mangyari giraray poon ngunian na Abril hasta Hunyo base sa inaapod nindang ‘‘historical high demand’’ durante sa mga bulan nin summer.
Sa pinaluwas na NGCP Energy conservation oya an mga minasunod na dapat gibohon: 1. Dai pagpabayaan naka stand-by-mode an TV asin iba pang appliances nin huli ta nagcoconsumo man ini nin kuryente. Tanggalon sa saksakan kun dai ginagamit; 2. Linigan an aircon filter asin condenser cada anom na bulan, isarado an pintuan sagcod bintana bago buksan an aircon nganing madaling maglipot; 3. I-schedule an pag plantsa sa sarong veces cada semana. Gibohon ini sa off-peak na oras antes mag alas 9:00 nin aga o pagkatapos nin alas 9 nin bangui; 4. I-defrost an ref paglampas na sa on-cuarto pulgada an yelo. Reparohon na marhay an pagkakasara kan pinto kan ref para seguradong dai nagluluwas an lipot; 5. Tanganing mas maliwanag an mga bumbilya, ugalion na punasan asin linigan an mga ini para mahali an mga alpog. Gamiton an led na bumbilya – Mas makakamenos halos 75% kaysa sa incandescent na bumbilya; asin 6. Regular na linigan an fan blades kan bentilador para mas makusog an duros, mas matipid pa sa consumo.
An pag-alertong ini kan NGCP bilang transmission operator na nagdedepende sana sa generation na naglalaog asin pigpapabulos sa mga cooperativa nin electricidad, sabi pa.
An Casureco I, II, III, asin IV sa Camarines Sur asin iba pang provincia sa Bicol nagpapatanid naman sa saindang mga miembros - consumedores na dapat magtipid sa paggamit kuryente huli ta naglalangkaw man an ‘‘demand’’ na haros taon-taon cada panahon nin tag-init nangyayari an biglaan na mga brownout. Alagad an NGCP sainda man giraray pig-aanuncio sa publico an dahilan kan brownout mantang an pagnipis causa kan ‘‘automatic load dropping’’. Nangyayari ini dai man sarabay sa sarong rehiyon.
An Department of Energy (DOE) nagpahayag na sa saindang naheheling an ‘‘total peak demand’’ kan 13,125 MegaWatts (MW) sa Luzon na dakulang posibilidad na mangyari sa kataposan kan Mayo 2023, na maabot sa 8.355% na paglangkaw hali sa aktuwal na 2022 ‘‘peak load’’ kan 12,113MW na enot nang nangyari kan Mayo 2022. (DPAureus)