NIA binasura an listahan nin mga paraoma na may utang sa patubig

Abot na sa 2,230 mga paraoma sa Kabikolan an benipisyado kan ibasura kan National Irrigation Administration (NIA) Bicol an saindang mga pangaran na may mga babayadan sa patubig.

An ‘‘condonation’’ nagcacantidad nin P246,468,670.13 na dakulang tabang sa sinambit na sektor nganing ibasura an saindang problema sa babayadan sa patubig.

An iniciativong ini kan ahencia parte kan padagos na implementasyon kan Acta Republica No. 10969 na mas bistado sa apod na ‘‘Free Irrigation Service Act (FISA)’’ na nagmamando na patawadon na kan saindang dai nababayadan sa patubig sa NIA, kabale na si iba pang utang asin mga penalidad, para sa mga paroma na maysadiring walong hektaryang daga.

Sa pinakahuring datus na pinaluwas kan ahencia igua nang total na P530,478,300.31 sa 4,128 kagsadiri nin daga sa Kabikolan. Malinaw sa saindang manifestasyon an pagtabang sa sinambit na sekor nganing mapalangkaw an saindang produksyon sa paroy.

Sinabi ni NIA Regional Manager Engr. Guadencio John De Vera an saindang programang ini komo tabang sa mga paraoma bako sanang mahale an saindang kautangan sa patubig envez makakatabang pa nganing totalmenteng ibasura na an saindang obligasyon financial.

Nagpasalamat man an mga Irrigators’ Association sa padagos na suporta kan ahencia nganing isikwal na an pagkakadisganar kan paraoma sa baratong presyo kan paroy.

Piglalaoman na madugang pa an matatabangan mantang igua pang nagpoproceso nganing mahale na an saindang obligasyon sa patubig.