Nilobong na mga armas kan NPA nasamsam kan militar

Lagonoy, Camarines Sur --- Liwat naman nakasamsam nin mga dekalibreng armas an Fuersa Armada kan Filipinas sa Sitio Benguet, Barangay Pinamihagan sa banwaan na ini sa ginibong operasyon kan Sabado, Deciembre 20, 2025.

Apat na mga armas an nasamsam kan pinagsarong fuersa kan tropa kan 83rd Infantry, kaiba an 2nd asin 49th Infantry Battalions. Apat na mga armas asin mga bala nakalut sa nilobongan kaini kan rebeldeng New People’s Army sa Barangay Pinamihagan, na kinababalihan nin apat na M-16 rifles kaibanan an mga magazines asin bandoliers.

Nakatabang nganing masamsam an mga armas huli sa cooperasyon kan mga sibilyan sa barangay.

Dai palang nahahaloy an mga soldados kan miliar sa Labo, Camarines Norte nakasamsam nin 45 mga dekalibreng armas asin mga bala na tinalbong sa daga kan mga armadong grupong rebelde huli ta padagos nang nagsusuroko an saindang mga ka-tropa sa CPP/NPA.

Nakua an mga armas asin bala sa Barangay Exciban, Labo, Camarines Norte, kasunod kan mga intelligence report sa military.

Sa ngunian digdi sa Camarines Sur na yaon digdi an kampo kan 9th Infantry Division sa Camp Elias Angeles, Pili, CSur igua nang onseng mga municipalidades na kabale sa listahan na ‘‘free insurgency’’ iyo an Camaligan, Canaman, Magarao, Bombon, Calabanga, Pili asin iba mantang igua naman nagkaperang mga banwaan sa provincia nin Albay asin Catanduanes na ‘‘free insurgency’’ province sa Bicol.

Mga dekalibreng armas nasamsam kan mga soldados kan 9th Infantry Division sa Sitio Benguet, Barangay Pinamihagan, Lagonoy, Camarines Sur. (9th ID)