NIRAMALAN KAN NBI: Ina nagbubugaw kan saiyang apat na aki kinasohan na

Nag-aatubang na nin caso kriminal sa corte sa Ciudad nin Naga an sarong 31 anyos na ina huli sa pambubugaw kan saiyang apat na mga aking menor de edad na babae sa paagi nin ‘‘online’’ sa ginibong operasyon kan National Bureau of Investigation Manila asin Ciudad nin Naga sa Barangay San Roque, Bombon Camarines Sur kan Lunes na hapon, Mayo 26, 2025.

Ini an kumfirmasyon sa media ni NBI Agent ‘‘Sha’’ pamayo kan Violence Against Women and Children (VAWC) Division kan NBI Manila mantang sinangat an caso sa paagi nin ‘‘inquest’’. An biktimang mga aki nag-eedad nin 2 hasta 17 anyos na binibenta sa mga ‘‘foreigner client’’. Sinda yaon na sa poder kan Department of Social Welfare and Development.

Nakumfiscar sa ina an limang mobile phone na ginagamit sa ilegal na actividad.

An mga caso na sinangat sa jusgado iyo an pagbalga sa Republic Act 11936 o mas midbid sa ‘‘Online sexual abuse and exploitation of children in the Philippines" asin an pagbalga sa RA 9262 na mapadapit sa violence against women and their children.

An operasyon ginibo huli sa kooperasyon kan sarong informer na hale pa sa Estados Unidos. Armado nin search warrant an mga taga NBI kan arestaron an ina sa ginigibo kaining ‘‘online sexual abuse and exploitation’’.

Sinabi pa kan NBI Agent an pang-aabuso kan ina nagpoon pa kan taon 2022 sagcod ngunian na 2025. An tarifa na saiyang sinisingil sa kliyente nagcacantidad nin 50 hasta 100 dolyares.

An suspek pigcustodiya ngona sa NBI district office sa Naga matapos maarestar sa saiyang residencia sa barangay San Roque.

An ina mayong trabado maging an saiyang esposo na ginagamit sa hanap buhay an saindang mga menor de edad na aking babae.