No collection policy estrictong pig-implementar kan DepEd Camarines Sur

Estrictong naimplementar kan Department of Education (DepEd) sa Camarines Sur an ‘‘No Collection Policy’’ sa pagpalista kan mga estudiantes nganing gabos na jovenes makaklase ngunian na school year 2025-2026.

Dawa boluntaryo maging awtorisado asin PTA contribution binabawal sa pagpa-enroll, sabi ni Atty. Salvador Pelingon an opisyal na parataram kan ahencia.

An Camarines Sur iyo an may pinakalangkaw na enrollees sa Bicol na iguang total na 252,369; Albay – 180,127; Masbate – 158,170; Sorsogon – 138,818; Camarines Norte – 136,616; Catanduanes – 28, 321; asin Masbate – 11,624; sa mga ciudades an Naga – 57,056; Legazpi – 38,491; Sorsogon – 39,756; Tabaco – 38,669; Ligao – 30,018; asin Masbate – 11,626 na iguang total na 1,129,130.

Dinagdag pa ni Pelingon ngunian na school year saindang tututokan an advocacia sa anti-bullying na kabale sa pinagbabawal kan ahencia.

Mientras tanto, sa Philippine National Police kan Camarines Sur, sinabi ni Provincial Director Col. Virgilio Olalia naging areglado si premirong aldaw na ralaogan sa klase ngunian na school year. An cada Municipal Police Station nagwarak nin kapupulisan sa mga escuelahan asin nagmantenir kan bulos trafico nganing maseguro an paz y orden asin proteksyon sa mga estudiantes.