‘‘No vax, no ride policy diskresyon kan LGUs-LTO

Ciudad nin Legazpi --- Dai makikiaram an Land Transportation Office (LTO) sa mga LGUs kun saindang iimplementar an ‘‘No vaccination, no rides policy’’ alagad digdi sa Kabikolan mayo pang ordinansa an mga lokal na gobierno.

Yaon pa sana sa National Capital Region (NCR) an implementasyon kan ‘‘No vax, no ride policy.’’

Ini an mga pahayag ni regional director Francisco Ranches, Jr. sa tahaw kan posibleng isunod naman digdi sa rehiyon sa mga pampasajerong jeepney asin van.

Kun daing ordinansa an LGUs an piglalaoman na mag-estricto asin magpaluwas nin guidelines iyo an national IATF sa paagi kan Land Transportation Franchising and Regulatory Board.

An LTO igwang grupo kan law enforcers nganing iyo an mag-implementar kan no vax, no rides policy depende sa direktiva kan national IATF.

An City Hall kan Ciudad nin Naga, enot nang nagpaluwas nin guidelines sa pampasajeong bus na hale NCR na dapat bakunado na alagad kun unvaccinated kaipuhan magsumiter kan saindang negative RT-PCR test result.

Maging an manijamiento kan Bicol Central Station mandato sa gabos na pasajeros na bakunado na alagad kun dai pa dapat magpa-RT-PCR test.

Mientras tanto, an LTO Bicol maging an mga district office pigmamantenir an pagiging estricto sa social distancing asin health protocols si may mga transaksyon sa saindang ahencia. (dpa)