Noche Buenas

Habang parani kita sa panahon nin Pasko, igua nin sarong ahensyang nag-calcular na sa quinientos de pesos (P500) may noche buena na ang sarong pamilya na may apat na miembro- ama, ina, asin duwang aki.

Sa mahal na presyo kan mga produkto ngonian sa mercado, dacul nag-kontra sa iniinsister kang ahensya na suficiente na ang kantidad na quinientos para mag-celebrar nin ka-Paskuhan. Sa kantidad na ini, igua ka na nin 500g na hamon - P170, 250g na spaghetti noodles - P30, spaghetti sauce -P48.50. Dagdagan pa nin macaroni salad, 200 grams elbow macaroni- P24 na may mayonnaise. Si sobrang sukli, puede pa makabakal corned beef o luncheon meat.

Siguro pag sinunod ta ang recomendacion can ahensya, saro sa miembro kan pamilya mahapot, “mayong maluto?” Ta maski ano man na ocasion, igua dapat maluto na may panira. Kung may sukli pa baad magkasya pa ang kabangang kilo nin bagas, si carne norte, gisahon na sana para maging ulam.

Duwang bagay sana.

Enot, iba ang pag-tipid sa simpleng celebracion, ta mayo man talagang kantidad ang kaogmahan nin pag-celebrar. Kaogmahan, bakong kapungawan. Mamundo ang celebracion ta nagsunod ngaya sa quinientos na noche buena (good night), nagging mala noche (bad night) lugod. Ang simpleng pag-celebrar, bako man pag-waldas, dai man maabot siete cientos mil ang sarong pamangui sana. Ang pag-tipid, garo ka nag-atendir ocasion siring sa kasalan, na nakapang-harong lang.

Marhay man siguro ang intencion kan ahensya, alagad insensitibo. Hababa na ang “purchasing power” kan P500, kan dekada nobenta pag nag grocery nakakabot duwang plastic bag na pano nin laog. Ngonian, sarong plastic bag na manipis sana. Pag lampas apat ang miembro nin pamilya, kulang na ang quinientos. Mas marhay nagtao na sana kuta nin range nin kantidad.

Ikaduwa, isali ta ang lokal na mercado, produkto kan satong mga paraoma asin parasira sa satong noche buena sa paagi kan pagbakal kan mga ini. Sensitibong pag-konsumo kaakibat kan responsableng pagkonsumo. Ang pagtangkilik kan mga lokal na produkto marhay na gawe ta ini nakakatabang sa paglago kan lokal na ekonomiya.

Giromdom ko kan ako nagtatrabaho sa Metro Manila bilang sarong call center agent, may Pasco saca Bagong Taon na dai ako nakauli sa Naga. Naeksperiyensiya ko na mag-Pasco nin solo asin may trabaho. Sa call center mi sinabat ang Pasco, triple pay, may handa ang compania-masisiram na pagkakan pero dai ka gaganahan. Garo kami kadto nasa retreat kan mga ka-opisina ko, pagharampang mi sa lamesa dai sanang girirongan ta mapungaw ngani. Igua nin sarong call o apod kadto, nagpatabang maayos ang saindang internet, nasolusyonan man. Inapod kan cliente ang saiyang aki asin pinakanta nin sarong Christmas song para sako bilang pasalamat. Iyo to si nagtao nin imbong sa malipot na Pascong ito, dai ko nanggad to malingawan. Ito ang masasabing noche buenas (sa terminong Bicol ang “buenas”, ang terminong “noche” Espaniol man giraraay - lucky night).

Dai nanggad kita malingaw kang tunay na saysay kan celebracion. Ta ang ispirito kan Pasco mahihiling sa presencia, pagmakulog asin sa kung pano kita magheras sa pamilya asin kapwa bako sa kung anong kinakan o hinanda ta kan noche buena.