Oil Deregulation Law dapat ibasura na ni PBBM

Sinabayan nin protesta kan progresibong grupo sa Camarines Sur na ginibo sa Plaza Rizal kan Ciudad nin Naga an inagurasyon ni Presidente Ferdinand Marcos Jr. kan Hunyo 30.

Alagad saro sa mayor na isyu na saindang hinahagad sa bagong administrasyon iyo an pagbasura kan Oil Deregulation Law asin excise tax sa produkto nin petrolyo na iyo an nagpapagabat sa padagos na paglangkaw kan presyo.

Dai naresolberan kan nagtalikod na administrasyon Duterte an problema sa halangkaw na presyo asin ngunian liwat nindang hinahagad ki Marcos na tawan nin solusyon.

Si Joel Pillogo, provincial coordinator kan CONDOR-PISTON sa Camarines Sur nagsabi na an paliog nang presyo sa produkto nin petrolyo bako lang sektor kan transporte an apektado envez an enterong namamanuan Filipino.

Huli kaini, padagos nindang kinukurahaw sa gobierno na resolberan an problema sa halangkaw na presyo kan lana sagcod na liwat nindang hinahagad an pagbasura kan oil deregulation law asin excise tax o kun dai man suspendiron mantang paliog na an presyo na gabos na sektor apektado.

Dawa pa ngani inaprubaran na kan Land Transportation Franchising and Regulatory Board (LTFRB) an dugang na flete sa sektor nin transporte alagad bako pa ining solusyon sa pagtios kan namamanuan Filipino, sabi pa kan lider kan CONDOR-PISTON.

An ginibong protesta pigparticiparan kan mga organisasyon nin progresibong grupo maging kan jovenes, estudiantes asin transporte mantang igwa man kaparejong protesta sa ibang mga provincia sa Bicol asin rehiyon nganing sabayan an inagurasyon ni Marcos.

Sinabi pa ni Pillogo na dai sinda nagsasawa sa pangapodan sa gobierno sa pagbasura kan oil deregulation law dawa na pigdadahilan na dai ninda kontrolado an presyo kan pribadong kompanya nin lana.

An gobierno an dapat magkontrol kan presyo bako sa dikta kan higanteng mga kompaniya nin lana.

An sinambit na ley nag-epekto kan panahon ni Presidente Fidel Ramos nganing magbarato an presyo alagad nagresulta na an mga kompaniya iyo an nagdidikta, dinagdagan pa kan mga buwis kan gobierno.

Magigirumduman, si Congresista Gabby Bordado kan tercer distrito kan Camarines Sur an naghurot na halion o kun dae suspendiron an excise tax nganing dai magparalangkaw an presyo kan lana alagad mayong ginibong aksyon an nagtalikod na administrasyon Duterte.

Maging nagkaperang mga senador an naghagad sa gobierno na suspendiron an excise tax alagad inabot nalang nin eleksyon mayong aksyon. (dpa)