top of page

Okay Canadian



Yaon ako sa Canada ngonyan. Sa provincia nin British Columbia, sa ciudad nin Kamloops. Naka-istar ako sa harong kana ki kong babae na si Maria Niña, agom na si Francis saka an tolong aki na si Cesca asin Kambal na sinda Miguel asin Mateo. Mag du-duwang semana na ako digdi poon kan Hulyo 02 kan mag-abot an sinakyan kong eroplano na Philippine Airlines nag-landing sa Vancouver International Airport.


Sinabat man ako nin mga aki. Ako asin an sakong kaiba na si Lory Leonem, nagtatrabaho man sa Canada, sa sarong Korean Restaurant na an waiter ay Robot!


An kakanon garo log-log na gulpi an sahog pero bakong maaskad. Masiramon. Basog kami ni Lory sa blow out ni Francis saka Niña.


Haling Vanvouver pasiring Kamloops, 4 na oras an biyahe. Naghali kami mga alas 5:00 hapon na maliwanag pa na naka-abot kami sa harong mga alas 10:00 nin bangui, bago pa lang mag-sulnop an aldaw.


Kina-agahan tulos, dai na ang-ontok an mga aktibidades sa pagsabat sakuya enot sa Sun Peak Cabin kun sain naghahalat an mga maku-apo ko. Garo na baga pista an pagkakan saka may mga inomon pa. Nagkarantahan sa videoke si mga amigos Y amigas ninda Francis saka Niña. Ako napalaban man sa sakuyang standard song na “Strangers in the Night”.


Pagkakarakan kanya-kanyang saray nin mga gamit ta an Cabin, pagsasaderi nin mag-agom na doktor na nagpasubli samo para sa okasyon.


Kun gurano kalinig kan pag-abot iyo man an linig paghali. Otro aldaw duman naman kami sa Lac Le Jeune Lake. An lugar may dakulang danaw na hararom asin malinig. Na magayon mag-istambay sa gilid asin mag-barbeque party. Malipoton an lugar maski an panahon na mainit. Malipoton an duros sa kapalibotan, palibot nin Pine Trees na halangkaw asin magagayon. Dikit lang an mga harong pero magagayon guibo sa mga kahoy asin pusog an pagka-guibo na magayon an disenyo.


Apuera kan barbeque may pinya, softdrinks, pakwan, pizza, zero alcohol beer saka fried chicken. Basog-basog ako sa mga masiram na pagkakan asin sa maogmang erestoryahan.


Namalisyahan ko, maogma an mga Pilipino digdi. Marahay an salud kan mga Pinoy, maogma asin nag-tatarabangan.


Kan naka-aguing Domingo, nagsimba kami. Pano-pano an simbahan, dakol an puti, dikit an itom. Dikiton an Pilipino pero solemning marhay an misa. May pakape saka snakan pakatapos.


May plano kuta si Santo Papa pagbisita digdi sa Kamloops tanganing bisitahon an residential na dating estada nin mga madreng Katoliko na may ataman na ginatos na mga aking lalaki. Sa Agosto kuta an schedule alagad dai nadagos. Kun tano dai pigsabi.


Nag-diretso kami sa Barriere sa magayon na harong asin jardin ni Ate Norma na pano-pano nin magagayon na burak, iba-iba an mga kolor.


Naraot lang an eksena dahil manamok. Pag-summer palan, lakop an namok digdi na nangangagat sa tao pero mayong dengue.


Fuerte si erestoryahan pat ikan mga puting Canadians na aram an politika sa Pilipinas. Nagparetrato kami, pigtaas mi an samong mga kamot na parang kandidato sa eleksyon.


Magayon an Canada para sa mga Pilipino na gustong magtrabaho digdi ta dakol an opportunidad . Halangkaw an sweldo asin magayon an padalagan kan gobyerno.


Ngonyan, mayo nang Face Mask digdi bakong arog sa Pilipinas na mahigpit pa sa Health Protocols.

Commentaires


bottom of page