Omboy na pigbasura kan magurang pigtawan nin disenteng lubong

Ni Paulo DS. Papa

TOLOS na pigtawan nin disenteng lubong an sarong babaeng omboy na nakuang gadan sa Naga City Sanitary Landfill sa Barangay San Isidro, syudad nin Naga kan nakaaging Lunes nin banggui, Setyembre 25.

Sa pakikipag-olay kan Bicol Mail ki Engr. Joel Martin, an pamayo kan Solid Waste Management Office, pigsabi kaini na nakua an aking babae, nasa siyam na bulan na an edad, na nakapatos nin plastic sando bag asin nasa laog nin karton ma alas-12:00 nin matanga.

Pigsabi kaini na nakasabay an bangkay kan aki sa mga basurang pigkolektar kan garbage truck sa areas kan Bagumbayan Norte, Bagumbayan Sur asin Sta. Cruz.

Nagtutubod si Martin na mga menor de edad an mga magurang kan omboy kaya naisipan na ibasura na sana an saindang aki huli sa dae pa maaraman na kadahilanan.

Nangapodan man ini sa mga opisyales kan mga nasambit na barangay na hanapon an mga konstitwenteng bagong pangaki tanganing maaraman kun si isay an ina kan inosenteng aki.

Martes nin aga, Setyembre 27 kan pagibuhan kan SWMO nin sadit asin simpleng kabaong an omboy tanganing duman na ibugtak sagkod darahon sa Our Lady of Immaculate Concepcion parish para sa bendisyon ni Rev. Fr. Elmer Pandes.

Alas-10:47 na nin aga kan paghatodon asin pagtalbungon an aki sa Naga City Public Cemetery kan nagkapirang personahes kan SWMO na nanghihinayang sa omboy.

Baby Angel an pigtaong pangaran kan SWMO na iyo man an pigpangaran kan padi durtante kan pagbendisyon.

Mientrastanto, nakiolay an Women and Children’s Protection Desk kan Naga City Police Station 4 na pabayaan na sa saindang disposisyon an sensitibong kaso.

SI Rev. Fr. Elmer Pandes kan Our Lady of Immaculate Concepcion na iyo an nangenotan sa pagbendisyon sa bangkay ni Baby Angel na nakua sa tambakan nin basura sa Naga City Sanitary Landfill. (Paulo DS. Papa)