Operasyon kan e-Ataman kan OVP sa bilog na nin CSur

Papahiwason na kan Office of the Vice President (OVP) an saindang Bayanihan e-Ataman operations sa bilog na Camarines Sur na enot nang operational na sa 3rd congressional district ni Diputado Gabby Bordado nganing ibaba na sa bilog na comunidad an paglaban sa coronavirus disease.


Si Consejal Dr. Sonny Rañola, Chairman kan Committee on Health sa Sangguniang Panlungsod kan Ciudad nin Naga nagpahayag sa Bicol Mail na nag-atubang sainda si Bise Presidente Leni Robredo sa urulay ninda kan mga doktor asin representantes kan mga hospital sa Ciudad nin Naga nganing urulayan an problema sa padagos na paglangkaw kan caso sa coronavirus disease sa ciudad asin Camarines Sur tanganing magtarabangan sa tahaw kan reclamo nasa full capacity na an mga hospital sa Covid-19 wards.


Presente sa urulay na ginibo kan Lunes, Hunyo 7 sa Avenue Plaza Hotel, Ciudad nin Naga an mga representante kan pribado asin gobiernong hospital, Camarines Sur Medical Society, City Health Officer asin iba pa.


Dakulang bagay an saindang meeting nganing makatabang sa inaatubang na krisis sa virus asin dapat pakusogon an advocacia sa vaccination program kan gobierno, sabi pa ni Rañola.


Sa saindang planong pahiwason an E-Ataman operations nagkaperang mga rekomendasyon an nahaman sa sinambit na urulay:

Sa tahaw si VP Leni Robredo pinangenotan an groundbreaking sa Angat Buhay Village sa Sitio Lapurisima, Brgy. Nato, Sagñay, Camarines Sur, kaibanan sinda Diputado Arnie Fuentebella, Alcalde Jovic Fuentebella, opisyales lokal asin mga ka-partner sa proyekto. (VP Robredo FB)


An enot dapat an mga LGUs tutugotan na an Home Quarantine alagad ciertohon na an pasyente igwang laen na cuarto asin comfort room na siya sana an magamit; 2. Seguradohon an LGUs igwang sadiring kumportableng isolation facilities para sa pasyente nagpopositivo sa Covid -19 na mga asymptomatic o mild symptoms, kun dai puede sa home quarantine; 3. Andam an e-Ataman na magtao nin libreng Covid care kits asin dapat ma-monitor aroaldaw. Alagad an pasyente na nasa red-flagged symptoms dadarahon sa doktor para sa magkakanigong interbensyon; asin 4. Mas marhay sa LGUs igwang sadiring oxygen tanks nganing matabangan an pasyente kun ini kaipuhan.


BAYANIHAN E-ATAMAN PINUNAN

KAN ABRIL 2021 SA NCRPLUS


An Bayanihan e-Ataman, sarong teleconsult service kaparejo kan Bayanihan E-Konsulta program, na piglansar kan OVP kan Abril 2021 sa NCRPlus Buble para sa outpatient care.

Pigpunan na sa tercer distrito kan Camarines Sur kan Mayo 2021 katuwang si Congresista Bordado, alagad pinahiwas na sa bilog na provincia.


COVID WARDS PANO

NIN MGA PASYENTE


Dai palang nahahaloy an Bicol Medical Center nagpaluwas nin aviso sa publico na an saindang isolation wards sa pasyente sa Covid-19 yaon na sa ‘‘full capacity’’.


Epektibo puon kan Domingo, Hunyo 6 sagcod na dai pa binabawi kan BMC. Huli kaini lilimitaran an pag-ako kan pasyente sa Covid-19 alagad maako sana kun ‘‘critical conditions’’


Nag-apelo na sa LGUs sa rehiyon Bicol na tabangan sinda na dagdagan an quarantine facilities nganing digdi darahon an may mga mild symptoms o asymptomatic.


Sa Ciudad nin Naga, pigconverter na an Our Lady of Lourdes Infirmary sa Barangay Carolina puon kan Hunyo 6 bilang temporaryong Covid-19 treatment facility. (DPA)