OPERASYON VS DROGA PADAGOS: 2,292 brgy declarado nang drug cleared-PNP

Apesar na igwa nang 2,292 drug cleared na mga barangay sa Bicol kabali an pinakahuring pigdeclarang sadit na municipalidad kan Bombon, Camarines Sur saka nawawalat pa an 501 na nasa proceso alagad dai naghuhuraw an nagkakadarakop na mga envuelto sa ilegal na droga.

Sa pinakahuring listahan kan Bicol PNP na pinamamayohan ni Regional Director PBGen Andre P. Dizon sa laog nin sarong semana (Enero 19–25, 2024) nagkaigwa nin 54 operasyon asin 65 indibiduwal an natalikop sa anom na high-value targets asin 59 individuals na nag-tatransaksyon sa mga kalye.

Sa sinambit na peryodo 169,03 gramos nin shabu na nagcacantidad nin P1.150,076.40 an nakumfiscar durante sa magkasabay na operasyon kan Anti-Criminality and Law Enforcement Operations (SACLEO) sa laog sana nin sarong semana.

Alagad dai na piglinaw kun sa mga drug cleared barangay igwa naman na na-arestar huli sa droga.

Sa enot na quince diyas kan Enero 2024 sa Ciudad nin Naga duwang sunod-sunod na operasyon an nagkadarakop kan Naga City Police Office sa Barangays Mabulo asin Cararayan na nakakumfiscaran nin labi sa P3 milyones.

An Masbate iyo an may halangkaw na nakumfiscar na droga na nagcacantidad nin P498,820.80, sunod an Camarines Norte cantidad P139,141.00, Sorsogon – P127,928.40, Albay – P91,388.00, Ciudad nin Naga – P34,570.00 asin Catanduanes – P1,040.

An PRO5 padagos na pig-iimplementar an BIDA o Buhay Ingatan, Droga’y Ayawan na may objetivo sa kumunidad na dapat isikwal an ilegal na droga.