Opisina legal kan City Hall iniimbestigaran an pigrereklamong bldg

Ni Paulo DS. Papa

PIGPOONAN nang imbestigaran kan City Legal Office an high-rise building sa Barangay Sta. Cruz, syudad nin Naga na pig-uuran nin kontrobersiya huli sa bayolasyon kan Familia Millete sa building permit na pigtao sainda kan City Engineer's Office.

Matatandaan, ipigtugot ni dating City Engr. Alexander Caning an pagtugdok nin sarong estraktura sa lugar alagad sundo anum na eksalon sana alagad nagsakat sa 13ng eskalon susug sa obserbasyon kan mga residente sa lugar - pigreklamo ki Punong Barangay Felix Matias Largo huli sa kahandalan.

Iyan man an bagay na pigkondenar ni Largo kaya nagkapira nang beses ini nagpadara nin surat ki dating Alkalde Nelson Legacion asin ngonian nagpadara na man kasuratan ki Alkaldesa Leni Robredo, laog an kahagadan na aksyonan an isyu.

Si City Engr. Elmer Albo, pigpapa adalan na man sa saiyang opisina an pundasyon kan building tanganing makagibo nin rekomendasyon kun man nanggad dapat nang ipadagos kan mga Millete an pagpahaman kan estraktura.

Segun ki Albo, an construction kan 13ng eskalon na building pigtugot kan opisina sentral kan Department of Public Works and Highways (DPWH) sa lindong pa ni dating Secretary Manuel Bonoan.

Dati nang hinagad ni Caning sa opisina sentral kan ahensya na patapyasan nin eskalon an pighahaman na estraktura alagad denied.

Huli digdi, idinuhol na kan city engineer ki Abogado Angel Ojastro, legal officer kan city hall, an paghanap nin aksyon sa bagay na ini. 

Kan pagsigatuhon an isyu sa opisina legal pigsabi ni Ojastro na pigpoonan na niya ngonian na semana an preliminary investigation sa isyu tanganing maaraman kun igwa man nanggad kapabayaan sa lado kan ahensya magin sa building officials sa syudad sa kontrobersiyal na building.

Segun ki Ojastro, saro sa mga aaramon sa imbestigasyon iyo an rason kan failure sa detection kan pagbalgar kan building owner orog sa poon pa sana, sa building permit na pig-siyu kan City Engineer’s Office.

Pigtutugot sa permiso na sarong building na may sundo anum na eskalon sana an dapat na itugdok sa lugar alagad nagsakat baga sa 13.

Dawa si Ojasto nagngalas kun ngata dae tolos naheling kan ahensya magin kan city hall an pagbalgar kan building owner apesar kan lokasyon yaon sa mismong sentro kan syudad.

Pigheras ni Ojastro na igwa nin mga building officials kan mga nakaagi na may potensyal na magin responsible sa bayolasyon.

Mantang nagpapadagos an preliminary investigation kan saiyang opisina masumetir an abogado nin rekomendasyon ki Alkaldesa Leni Robredo na igutan an monitoring sa building tanganing maaraman tolos kun may pending pang patrabaho sa estraktura.