Opisyales kan Barangay suportado an comunidad kan IPs

Ni Sonny Malate

Goa, Camarines Sur --- Dakula an kaogmahan asin pasasalamat ni Indigenous Peoples Mandatory Representative (IPMR) sa Sangguniang Bayan Rafael G. Belleza sa suporta kan oficiales kan barangay sa mga Indigenous Peoples (IPs) digdi.

An mga barangay kapitan, kagawad asin chieftain  kan 12 barangay sa banwaan kan Goa na pig-eerokan kan comunidad kan Agta Tabangnon naging presente sa duwang aldaw na training asin seminar workshop dapit sa Indigenous Peoples Rights Acts of 1997 o RA 8371,  na ginibo sa barangay Catagbacan.

An ley may objetong magreconusir, protehir asin sustenir kan apat na derechos kan IPs sa ancestral domain, self governance asin empowerment, social justice, human rights asin cultural integrity. Sa presente,  pigkakarkulong nasa 14M hasta 17M an mga IPs sa nacion.

Sa Goa  an numero kan IPs labing diez mil na asin mapalad ta sinda igua nang boses sa Sangguniang Bayan na nagtutulod kan saindang derechos bilang miembros kan comunidad.

Naging resource  speaker iyo sinda Atty. Charo Limbo, Assistant Regional Director kan  National Commission for Indigenous People's (NCIP) asin Dr. Jesusa Taumotorgo kan CBSUA Pili.

Segun ki Belleza,  ngonian na taon an tema para sa Indigenous Peoples Day, "Weaving Culture, Enriching Future, Empowering Indigenous Commuties as Bedrock of Sustainable Development."

Huli sa saindang  kasiribotan, an okasyon kan IPs sa Goa gigibohon sa masunod na bulan kun saen dakul na mga nakalinyadang mga actividad, tampok an pambihirang pag-iribahan asin cultura kan Agta Tabangnon digdi.

Pigbuyagyag IPMR Belleza na an saindang comunidad nakarecebi nin dakulang tabang gikan sa Department of Agriculture- Bicol. Kabale digdi iyo an sarong unit nin tractora, fertilizer, pesticide asin pananom na abaca.

Dagdag pa an mga itatanom na mga gugulayon asin mga bungangkahoy. May pigduhol pang damulag asin baka para sa dispersal kaini sa 12 barangay kan IPs.

Sa lado nin edukasyon, an mga IPs nagkaigua na nin mga graduado sa irarom kan scholarship program para sa mga capableng estudiantes. Sa salud, may regular man na feeding program para sa mga kaakian.

Nakatalaan man na magpasairarom sa training course dapit sa pag-ataman nin hayop asin pag-uuma an duwang huben na IP sa Cagayan de Oro. Mientrastanto, may duwang oficial an maatendir sa benchmarking sa Mindoro.

Pigpahayag pa ni Belleza na sa presente may pigkakalap sindang fundo para sa pagconstruir nin multi-purpose building na maserbing evacuation center sa barangay Payatan asin Salog.

Si Belleza nasa primerong termino bilang ex-oficio member kan Sangguniang Bayan kan Goa. Base sa ley, hasta sa tolong termino o siyam na taon an puwedeng itiner kan IPMR sa puwesto sa local na consejo.