Oplan Pasko ilalansar kan LTO district office

Ciudad nin Naga --- Sa dai mahahaloy masikad na an Oplan Pasko kan Land Transportation Office (LTO) district office digdi alagad hinahalat ngona an ipapaluwas na memorandum kan saindang opisina sentral.

Si Grace Rojas, jefe kan LTO sa ciudad nagpahayag an misyon kan saindang oplan iyo an pagconducir nin inspeksyon kan vehiculos sa terminal para sa ‘‘road safety’’ kan saindang pasajeros.

Kabale sa saindang liliboton iyo an bus, jeepney, asin ban terminal maging si luwas laog na mga pampasajerong vehiculos sa ciudad siring kan bus viajeng Manila asin pagtaraid na mga banwaan.

Ngunian na panahon nin Pasko dakul an viajeros papuli sa ciudad asin pagtaraid na lugar.

Papagirumduman kan ahencia an mga tsuper na segurohon an road safety sa tinampo mantang dapat pangatamanan an saindang pasajeros.

Sa report kan Naga City Police Office haros aroaldaw limang caso nin mga road accident an nangyayari.

Dai palang nahahaloy an DOH Bicol nakisumaro sa National Day of Remembrance sa mga road crash victims, siring kan survivors asin sa saindang familia na ginibo an actividad sa Camp Simeon Ola, Ciudad nin Legazpi.

Sa programa saro sa natukar iyo an violence prevention injury asin tinawan doon ni Dr. Rosa Maria Rempillo, assistant regional director kan DOH Bicol an importancia kan road safety.

‘‘Hindi lang ito pag-iingat sa ating sarili kundi pag-iingat sa pamilya at pag iingat din sa gumagamit ng kalsada,’’ sabi pa ni Dr. Rempillo sa saiyang mensaje.

Sa ginibong programa natukar an road safety driving, dahilan kan mga aksidente asin post crash response.