Oplan Plaka Check kan LTO Bicol nagpapadagos

An Land Transportation Office (LTO) Bicol nagsikad tolos kan ‘‘roll outs’’ kaini sa ‘‘LTO OPLAN PLAKA CHECK’’ sa mga motorcycles na nag-rehistro poon kan 2014 hasta 2017.

Bilang aksyon sa direktiva ni Presidente Ferdinand Marcos Jr. asin DOTr Secretary Vince Dizon, an mga law enforcers kan LTO Bicol sa pamamayo ni Regional Director Allan Castillejos asin iba pang opisyales kaini sa cada District Office, tolos nagrulowas sa mga ciudades na iyo an may rinibong vehiculos na padagos na kan saindang mga ginigibong check point alagad bako sa pag-isyu nin ticket sa pagbalga sa leyes trafico envez mag-implementar sa directiva ni Marcos asin kan saindang opisina sentral.

Sinabi kan LTO Bicol an ‘‘motorcycle owners’’ o kagsadiri na igua nang rehistro sa arin man na District Office poon kan 2014 hasta 2017 na mayo pang plaka base sa saindang certificate of registration (CR) pwede nang magkua kan saindang plaka sa opisina rehiyon o maging sa mga District Office.

An saindang mga Plate Section kan DO preparado na mag-distribuer kan mga plaka na nagdadakul na an mga nagpipirila poon Lunes hasta Viernes.

An ibang mga District Officer nagluluwas na sa mga banwaan bako lang sa ciudades sagcod sa mga barangay an saindang sunod na target.

Napag-araman sa LTO Bicol labi sa 200 mil na mga plaka an saindang nakatalaan na idistribuer alagad depende sa mga nag-aabot pang mga bago hale sa Manila.

An ibang motorista nabibigla kan mga warak na personajes kan ahencia alagad piglinaw na sinda na an nagruruluwas nganing directang marecibe sa mga check point.

LTO Pili Extension Office aroaldaw pigbibisita nin mga motorista nganing magkua kan saindang plaka afuera kan saindang ginigibong Oplan Plaka Check sa mga mayor na kalye kan banwaan. (LTO Pili)