ORAGON!

Tigsik ko an Daragang Magayon 

Naranga ako kan mahamis na huyom

An kuwintas siling maharangon

An palda alang na dahon kan natong!

Tigsik ko an maisog na si Handiong

Pitong dagat an saiyang linangoy

Sinabat an kikilat, linog, daguldol

Mahiling lang an Daragang Magayon!

Tigsik ko si Lando Bicolano

Kun mamoot, liputok, totoo

An daghan biyong nagkakalayo

Sobrang lanit, garong rimurimo!

Tigsik ko si Padi saka Madi

Paboritong dulce: pili asin sili

Manatok an pili, sili panremate

Namalnas nin ganot kada banggi!

Tigsik ko an dagang Kabikolan

Linubngan kan sakong inulnan

Dae malingawan saen man magduman

Yaon sa puso sakong namomotan!

Tigsik ko po Ako

Sarong Bicolano

Yo! Pig-oorgulyo

Oragon po Ako!