Oragon na int’l artist orgulyo kan Lagonoy

Ni Sonny Malate

LAGONOY, CAMARINES SUR ---  Dakulaon na onra para sa banwaan na ini an magkaiguang  sadiring aki na sarong  multi-awarded international artist, may hararom na paggiromdom sa banwang ginikanan, asin pagmakulog  sa pag-iribang mga Bicolanong visual artist.

An oragon na Lagonoyon  na ini liwat na nagbuwelta sa saiyang banwang ginikanan tanganing iheras an mga obrang piyesa sa mga kahimanwa sa paagi nin sarong art exhibit. An mga obra may temang dapit sa local na cultura arog kan mga piyesang parati niyang pighihimo.

Si Pancho Piano na tubong barangay Mangogon, north coastal Lagonoy, tampok sa art exhibit kan Abril 27 hasta Mayo 2, 2023,  sa lobby kan Municipal Hall kan banwaan na ini. Ini katakod kan ika-14 taon na celebrasyon kan Lagonoy Samhod Festival.

Nagkakapira sa mga piyesa an naapreciar asin binakal kan mga Lagonoyon asin mga dayo sa presyong Lagonoyon.

An art exhibit sa Lagonoy  pighimo ni Alkalde JB Pilapil III tanganing orug na magin makahulogan an celebrasyon kan Samhod Festival  asin pintakasi kan St. Philip and James sa Abril 30 asin Mayo 1, 2023.

Segun ki Piano dae  pa sana nahahaloy, siya  nagin recipiente kan prestigiousong award bilang Outstanding International Visual Artist gikan sa US-based na grupong may interest sa Arte. Enot pa kaini, siya pigduholan man nin pagmidbid bilang Outstanding Bicolano Visual Artist Award.

Si Piano recipiente pa man nin maabot sa 20 mga award hale sa manlaenlaen na award-giving bodies.

Bilang sarong matibay na visual artist, si Piano may pambihirang abilidad sa linya nin iba-ibang visual arts, alagad orug siyang nabistong de calibreng visual artist bilang muralist, abstractionist asin stained glass artist. Sa Bicol asin ibang parte kan nacion asin kinaban, dakol na an mga  commissioned works an  nahaman niya. An saro kaini yaon mismo sa lobby kan Municipal Hall kan Lagonoy.

Si Piano iyo an nag pundar kan Salingoy Art Grupo, sarong grupo nin mga visual artist sa Camarines Sur. Activo man siya sa mga art exhibit asin mga arts engagement sa Naga, Legaspi saka ibang parte kan Kabikolan na nagmamawot na maparambong an culturang Bicolnon.

Saro man siyang taga suporta kan mga huben na visual artist sa paagi kan pagbakal kan mga piyesa ninda sa mga art exhibit. Sa mga maabot na taon posibleng magpadrino man siyang mga scholar sa cursong katakod sa visual arts. 

Sa kadakulon nang mga nahaman na obrang piyesa asin mga commissioned works asin nagunong mga award, segun ki Piano dae pa niya  naabot an peak o pinakahalangkaw na level kan saiyang career bilang sarong visual artist.

Sa mga masunod na taon,  pigpaplano kan premyadong visual artist na makahaman nin sarong obra na magigin iconic art piece para sa ginikanan niyang banwaan. Ini sarong piyesa na mataong identity o pagkakamidbid, orgulyo asin inspirasyon sa mga Lagonoyon.

Bilang pagmidmid kan pambihirang talento ni Piano asin dakulang onrang itinao niya sa mga Lagonoyon sa linya kan stained glass painting, abstract arts asin mural painting,  an local na gobyerno kan Lagonoy, sa paagi ni Alkalde JB Pilapil III, nagduhol digdi nin Plaque of Recognition kan Abril 27, 2023.