Oragon na visual artists nadeskubre sa selda kan BJMP
Ni Sonny Malate
Magkaminsan an diamante nanunumpongan sa lugar na dae mo piglalaoman. Si Jail Officer 3 (JO3) Mac Allison A. Calleja, ini sa laog kan selda kan karsel niya nadukayan.
Sarong registered nurse asin de calibreng visual artist, pinili ni Calleja na magheras kan saiyang servicio sa mga Person Deprived of Liberty (PDL), enot sa Bureau of Jail Management and Penology (BJMP) sa National Capital Region (NCR) kan 2011.
Kan taon 2017, siya pigbalyo nin destino sa Libmanan District Jail. Durante kan panahon kan Covid-19 Pandemic kun saen ipinangalad an pagdalaw kan kapamilya sa mga PDL, pig-organizar niya an sadit na grupo nin mga PDL na may potential sa pagpinta bilang parte kan programang pangkabuhayan kan mga nasa karsel.
An grupo inapod na Artists Behind Bars o Jail Artists. Miembros kaini nagpopoon sa edad 18 hasta 65 asin nasa laog kan karsel huli sa iba-ibang caso. Huli sa kapungawan sa pamilya nagin kaalingan ninda an paghagod nin brutsa.
Mayong formal na edukasyon sa visual arts an miembros kaya bakong madali para sa JO3 na taison an saindang potential sa linya nin Arte. Huli sa tiyaga asin dedikasyon ni Calleja, an grupo luwayluway na nagkaiguang talento asin passion sa pagpinta, dalan tanganing sinda makadayon sa mga art exhibit.
Kan taon 2023 pigbalyo si Calleja sa Naga City District Jail. Digdi nadagdagan an miembros kan jail artists. Sa ngonian ini nasa 17 na, kairiba an gikan sa Libmanan District Jail. Sa pambihirang talento, disiplina asin passion sa Arte, pigcoconsiderar ni Calleja na mga diamante sinda sa laog kan karsel.
Kabali sa mga presenteng nasa laog kan selda iyo pa an mga nakaluwas na. An iba sa sainda nagbabale sa art exhibit kan grupo kaya productibo para sa pamilya asin comunidad. Sa gabos kaini si Calleja sobra an ogma mantang sa pagguiya niya nagtalubo bako sanang an talento ninda kundi pati pananaw sa kagayonan kan buhay asin kinaban.
Segun ki Calleja, sa ngonian labing 20ng art exhibit, trade fair asin festival na an pigdayonan kan mga visual artists kairiba pa an ibang mga detainee na may talento sa paggibo nin handicrafts, souvenir items asin ibang magayon na producto.
Pinakahuri digdi iyo an sa Bishop Francisco Gainza Trade. Fair asin TAGBOAN katakod kan Naga City Creative Industries Festival kan Septiembre.
Dawa na ngani mayo mismo sa lugar kan events, dakulaon na ogma kan mga miembros na nagkaigua sindang ganada sa nabentang mga piyesa. Alagad, labi pa sa financial na naguno, magayagaya sa boot ninda na naapreciar an resulta kan saindang talentong gikan sa Kagurangnan.
Katakod kaini nagpasalamat si Calleja sa sustenidong suporta ninda BJMP Regional Director JSSUPT Jose Gemelo C. Taol, DSC, JSINS Ralph Vincent M Bobis, Acting Warden kan Naga City District Jail, mga benefactor saka NGOs.
Nangapodan man siya sa kapamilya kan mga PDL asin comunidad na makipagtabangan sa BJMP sa kamawotan .ninda sa pagprotehir asin pagpaorug kan kapakanan ninda.
Nagpagiromdom siya na nasa proceso pa an caso ninda asin nuncang pabayaan, husgaran o condenaron.
An pangapodan ni Calleja significante katakod kan pagcelebrar kan National Correctional Consciousness Week sa huring semana kan Octobre. Obheto kaini an ibusol an kapakanan, makatawong pagtratar, rehabilitasyon asin matrayumpong pagbuwelta kan PDL, probationers saka parolees sa sociodad.
Comments