Order kan DOH para sa opisyal na pagsarakan quarantine facility sa CSNHS, pighahalat

Pighahalat na sana kan Naga City Hospital (NCH) an kasuguan kan Department of Health (DOH) tanganing opisyalmente nang isara an Camarines Sur National High School – Liboton campus bilang quarantine facility kan lokal na gobyerno.

An hagad na pormal nang isara an eskwelahan bilang isolation o quarantine facility igwa nin sertipikasyon o pag-endorso kan City Health Office na nagsasabing zero admission na sa pasyente nin Covid-19 an lugar poon pa kan Febrero 2022. An sertipikasyon pirmado ni City Health Officer Vito Borja, M.D.

Segun ki Dr Jospeh Sanchez, hepe kan NCH, kaipuhan man giraray an opisyal na pagtugot kan DOH dapit sa sinambit nang kahagadan.

Ngonian na semana, pigpoonan nang hakoton an mga hospital beds sa eskwelahan tanganing maisaray nang toltol asin matawan nin dalan an piggigibong preparasyon para sa pagpapadagos kan full in-person classes sa eskwelahan sa bulan nin Agosto.

Apwera kaini, pig-eenkaminar na sana kan ospital an home isolation para sa matatamaan pa nin Covid-19 sa syudad huli na man sa pagigin manageable kan helang; bastanteng kaaraman kan publiko sa pag-likay asin pagmanehar sa Covid-19 asin padagos na vaccination drive.

Abiso ni Sanchez na magpa booster tanganing mapakusog liwat an proteksyon kontra sa virus.

Sa pigpaluwas na sertipikasyon, pigsasabi man kan City Health Office na ligtas an eskwelahan tanganing gamiton bilang voting center sa nakatalaan na barangay elections sa maabot na bulan nin Disyembre 5, 2022, na kun saen ipapaotob man giraray an health standards kan DOH.

Nakapalaman man sa notisya kan Commission on Elections na pirmado ni acting election officer Atty Ednalyn Garcia – Referiza na aprobado an kahagadan kan saiyang opisina para sa reversion kan eskwelahan gikan sa pagigin quarantine facility bilang orihinal na voting center kan Barangay Liboton.

Basado man sa certificate of consent na pirmado ni Sulpicio Alferez, principal kan CSNHS, an pagtugot kan eskwelahan sa reversion pigbase sa issuance kan sertipikasyon ni Borja.