Ordinansa sa pagpaarkila kan MNSC sa Brgy Pacol buhay pa

Buhay pa an ordinansa sa pagpa-arkila sa pribadong sektor kan diez hektaryang lote sa Metro Naga Sports Complex (MNSC) sa Barangay Pacol, Ciudad nin Naga alagad an pinasar na resolusyon sa Sangguniang Panlungsod na nagdedeclarang sana nin ‘‘failure of bidding’’.

Ini an piglinaw ni Consejal Salvador Del Castillo, pamayo kan Committee on City Property kan SP na padreno sa ordinance number 23-096 na nagtutugot an ciudad sa pagpaarkila kan sports complex.

Kan gibohon si subasta kan BAC, an Naga College Foundation iyo si unikong pustador alagad sa huring desisyon nagdeclara an SP nin ‘‘failure of bidding’’.

Alagad nagtutubod an consejal na ipapaubaya na ni Alcalde Nelson Legacion an desisyon sa masunod na administrasyon kan City Hall.

Sa seccion 4 kan ordinansa papaarkilahan kan ciudad nin bulanan na cantidad Php100,000 asin dapat advance nin sarong bulan sa cada ika-limang aldaw kan bulan mantang madurar an arkila sundo sa 15 taon, renewable sa maximum sa kaparejong peryodo o 15 taon, asin sa cada ika-limang taon magkakaigua liwat nin pag-aadal sa kontrata.

An resolusyon kan SP paborable sa amay na paghagad nin tabang ni dating VP Leni Robredo ki Senate President Chiz Escudero na nagpahayag na mataong P150-M para sa rehabilitasyon kan sports complex.

Igua nang enot na report na igua nang Special Allotment Release Order sa DPWH alagad sa surat kan 3rd Engineering District naghahagad palang nin endorsement sa consejo kan ciudad.

Sinabi ni Del Castillo na nagpasar na nin resolusyon an SP asin City Development Council nin ‘‘endorsement’’ na hinahagad kan DPWH.

Si Robredo, cierto nang masunod na alcalde kan Ciudad nin Naga mantang mayo man nin magabat na kalaban sa eleksyon lokal sa Mayo 12, 2025.