Orolay-olay

Saro sa pinaka-importanteng guibo nin tao iyo an pag-orolay-olay.

Naguiguiromduman ko pati kan dekada 90 an sakuyang programang “Orolay-olay sa Naga” katabang ko idtong depuntong Lito Lopez na maestro sa CamHi, alabis broadcaster asin movie critic na ka-tandem kadtong depuntong David Dollano.

Gabos na klaseng tao nakaka-olay mi kadto, an venue kun bakong DWLV sa Balatas, sa sarong restaurant sa centro.

Kaiba sa mga naka-orolay mi kadto iyo sinda Ministro Aquilino Pimentel Jr ( ama ni Senador Coco Pimentel), ministro siya kan Interior & Local Government ni Pres Cory kadto, Mayor Jesse Robredo kan Naga, Mayor Joe Meceda kan Buhi, Mayor Romy Reyes kan Pasacao, Mrs. Carmen Villafuerte Bernas na sarong religious leader, Mrs. Noning Dy-Lliaco na sarong parasurat asin Bikolista, Luis Ortega asin Alfredo Cabral na mga konsehales kan Naga, mga taga-media arog ki Nol Saduia, Wing Santo Domingo, Paco Felicidario, Remy Angeles, Mon Tolaram, Eking Alpaήo asin kadakul-dakol pang iba maski ordinaryong namamanwaan asin paradangog sa radyo.

Juven pa ako kadto antes ako maguin Bokal kan provincia pero tapos nang maguin Vice-Mayor asin Mayor kan Milaor.

Kulibat ko palan si Governor Louie Villafuerte nakaka-olay ko lang sa iba kong programa sa radyo arog kan “Marhay na Aga Bikolandia” pagka-aga . Nakaka-olay ko man siya sa kuarto niya mismo kun minsan maghapon, kun minsan mag-aga. Kun mag-ansyas kang maghali pupugulan ka sa siko tanganing dae makahali.

Gulpi akong nanudan sa orolay-olay on- the-air sa radyo. Lalo na off-the-air.

Ngonyan na retirado na ako sa media, sa radyo asin TV pero sige pa ako sa diyaryo tibaad mag-publikar pa nin bagong libro na an plano ko an titulo “Orolay-olay, Kape-kape sa Kantong Putikon”.

Nagpoon akong maglibot bako lang sa Milaor, kun nagdidistribuir ako nin diyaryong Bicol Mail sa apat o limang na baryo kan poblacion kada Biyernes asin Sabado nakaka-olay ko an dakul na tao sa talipapa, sa pulis HQ asin fire station, sa tahaw kan tinampo, mga parasimba, mga bagong magpuli na mga balik-bayan, mga dating ka-opisina sa municipyo, mga dating kaklase, mga partidaryo asin kadakul pang iba na nagheheras man kan saindang mga ideya asin reaksyon sa mga pangyayari sa banwaan asin kinaban.

Nakaka-abot man ako sa barangay Del Rosario kan Naga partikularmente sa Villa Corazon Subd kun sain ako nakakalibot dara an sakong “walker”. Ka-olay ko an mga tindera, mga shoppers sa Vista Mall an bagong mall sa Naga, an mga parapasyar, mga para-padyak asin kadakul pang iba.

Aro-aldaw ka-olay ko an sakong amigo, retiradong bankero, basketbolista asin dating editor kan babasahon na “Maogmang Lugar” sa Ateneo na si Jimmy Veneracion, 75. Mga topic mi an high school days, mga barkada kan dekada 60-70, mga tugtog asin musika kaidto, mga pelikula sa Netflex, baraylihan asin party, English kaidto asin Bikol ngonyan, nagraralakaw-lakaw kami sa palibot kan subdivision asin nag-eesnack sa sarong kakanan sa Villa Corazon, paborito mi an baduya asin giniris saka lomi ni Mrs. Euste kairiba mi mga paratukdo, mga empleyado kan Casureco asin mga estudyantes saka teenagers.

Sarong beses kaiba mi si Jimmy Arejola, 77, valedictorian kan Ateneo high school batch ‘64 nagduman kami sa saiyang harong sa Carolina na dating HQ o opisina kan bio-solar farm sa kilometro 11. Topic mi an estorya ni Heneral Loduvico Arejola asin Tomas Arejola propagandista kan panahon nin revolucion kontra Espanyol, naguin Assemblyman kan premirong Philippine Assembly na nag-banga kan Ambos Camarines kan 1917 na nagbunga kan Camarines Sur asin Camarines Norte. An saiyang esposa na si Mercedes, magayonon na babae alagad mayong aki iyo an nagtao nin pangaran sa banwaan na Mercedes Camarines Norte. An pamilya mahiwas an kadagaan sa Camarines Sur asin Naga alagad napa-irarom sa land reform nagkawarara an daga.

Sa Milaor an mga nagdadalaw sako sa sakuyang bahay-kubo iyo sa Rudy Follero na agom kan sakuyang pinsan, an topic me Knights of Columbus, si padding Edgar Baraero, Jr Encinas na aijado ko, si pading Manuel Pangan an topic mi politika sa Milaor asin Minalabac, minahapit man sakuya an sakuyang aijado na si Mayor-Gil Basmayor, an aijada kong si Elaine Parma na mahilig sa negosyo asin saro man na blogger. Sarong beses hinapit niya ako asin dinara ako sa Magarao nagduman kami sa harong ni Luis Cabalquinto, an sikat na na makata o poet sa New York USA. Nagpuli siya hali sa Amerrica asin nagtuga na an nakukua niyang income sa America iyo an ginagamit niyang pampagayon sa saiyang harong sa Magarao, asin pinapa-eskwela sa saiyang sobreno Y sobrena sa Pinas. Maogma pa siya sa edad na 86.

Ka-ulay ko man permi an sakuyang kataid sa harong na si Mrs. Elsa Manzano Alba na an topic mi iyo an buhay sa America asin buhay Pilipinas. Haloy siya duman sa estado kan New Jersey alagad ngonyan na labi na siyang 85 nagpuli na siya sa Pilipinas asin sa Milaor “for good”.

An ultimo kong kaurolay-olay dae pa lang nahahaloy iyo an mga eskwela sa “Abbatoir barangay high school” sa Naga. Hapot ninda sako kun ano an teknolohiya kan panahon nyamo, sabi ko mayo. Radyo sana an nadadangog kaidto sa transistor. An bareta hali pa sa diyaryo na pighahatod kan airoplano na pigbabasa kan announcer hali sa diyayro kaya daan na nin duwa o tolong aldaw hali pa sa Manila. An mga aki si April Mitch Caήezo, Angel V. Balderama asin Mark A. Dino na naghahagad estorya kan panahon. Sabi ko sainda mayong teknolohiya, mayong gadyet, mayong cellphone kaidto. An mga kawatan ko ako mismo an naguiguibo, mayong binabakal sa centro.

An kawat mi taraguan, aragawan base, parariha, step yes step no asin kun minsan borontolan na mayong gloves. Interesado sinda kun pano ako nakalaog sa media. Sabi ko 18 anyos naglaog na ako sa radyo bilang field reporter asin news writer sa ABS CBN- DZRB Naga, (the voice of Bikolandia), cub reporter kan Bicol Mail kan 1968. An sweldo 30 pesos kada semana asin sa radyo 100 pesos an bulan. Sabagay iskolar man ako sa UNC ta associate editor asin columnist ako kan school publication Nueva Caceres na nagluluwas duwang beses sa sarong bulan.

An mga barkada ko arog ki Emil Saavedra, Jerry Claveria, Jhonny Delos Santos, Luz Equipado, Irma Peήalosa, Delia Esguera, Francia Reyna, Lydia Caning. Nagraralakaw kami naka-bitis sa palibot kan Naga asin an samuyang paboritong kakanan diyan sa likod kan Bichara kun sain kami mina-snack kun matanga.

Ngonyan an mga ka-olay ko iyo an mga aki ko asin manugang, mga maku-apo na sinda Poldo, CD asin sa long distance si Ceska asin kambal na Miguel asin Mateo. May mga dagdag pang maku-apo si Iman, si Andrie, si Asher, si JM, si KC, si Luke, si Lance saka Banoy.

Importante an orolay-olay ta nakakapalawig nin buhay.