OTBT kampanya pa vs droga

Sarong paagi sa kampanya laban sa pagprubar na magpapuslit nin ilegal na droga asin iba pang kriminalidad an padagos na ginigibong One-Time-Big Time (OTBT) Checkpoint kan Naga City Police Office.

Bako lang sa misyon sa road safety maging sa paglaban sa kriminalidad, sabi ni City Director P/Col. Erwin Rebellion kan NCPO.

Kan magtukaw bilang bagong City Director kan Enero 2024 saro sa saiyang pigponan iyo an OTBT na pagtubod kan ibang pasaway sa trafico sa premiro sanang mga bulan alagad ipapadagos ngunian na Marso sagcod na maninigo pa.

Sinabi ni Rebellion dai na nakakabuelo an masuplay sa ciudad nin ilegal na droga sa paagi nin viaje sa tinampo mantang igwa pang mga suway na operasyon laban sa droga mala ngani sunod-sunod an darakulang cantidad an nakukumfiscar sa drug operations sagcod na kinasohan an mga suspek sa jusgado.

Saludo an City Hall sa liderato kan pamayo kan NCPO huli kan pigwarak na mga police visibility sa trafico saka sa commercial district.

Sa tahaw kan kampanya sa road safety alagad segun pa sa NCPO sa ngunian naglangkaw an aksidente sa trafico na igwa nang 40 insidente sa mga mayor na kalye.

Katuwang kan NCPO sa OTBT iyo an Public Safety Office, Land Transportation Office nganing estrictong ipautob an traffic ordinance kan lokal na gobierno maging an ley nasyonal sa trafico.

Misyon kan NCPO magkaigwa nin matuninong na paz y orden, magbaba an mga insidente sa road crash.

An OTBT ano man na oras nabutwa nganing si mga traffic violators magkasirikop.