top of page

P1.5-M binayad kan DA sa mga apektado kan ASF sa Camarines Norte

Pili, Camarines Sur ---An opisina rehiyonal kan Department of Agriculture nagbayad na nin P1,555,000 sa 57 paraoma sa Camarines Norte bilang ayuda sa mga apektado kan African Swine Fever (ASF).


Alagad bulan pa nin Deciembre 2023 naiwaras na para sa 311 mga orig na cantidad P5,000 an binabayad para sa cada sarong payo kan hayop asin an fondo hali sa Quick Response Fund kan ahencia.


Sagcod sa ngunian apektado pa an banwaan nin Labo, Camarines Norte mala ngani nagdeclara nin state of calamity an LGU sa pamamayo ni Alcalde Severino Franciso tanganing magamit an fondo sa calamidad kan municipio asin matabangan an naapektaran kan ASF.


An ibang mga hog raisers nagbabasol sa LGU huli ta ngunian sanang Enero 2024 nagdeclara nin state of calamity apesar dakul nang apektado mantang igwa nang rekomendasyon sa DA.


Kan bulan nin Deciembre 2023 sinuspende kan National Meat Inspection Service an operasyon kan slaughter house kan Labo matapos madiscobre na digdi nagpoon si virus. An opisina na pinamamayohan ni Director Alex Templonueva nagpa-disinfect sa lugar kan bunoan hayop nganing dai magparalangkaw an caso.


Napag-araman sa Provincial Veterinary Office sa doceng municipalidad kan Camarines Norte, tolo an declaradong ASF-free alagad an nawalat pang siyam igwa nang positivo sa sinambit na virus sa ataman na hayop.


An provinciang ini iyo an apektado kan virus na dai man pigcoconsiderar kan DA na nakaka-alarma an caso sa Bicol. Sa Camarines Sur enot nang pig-report na igwang caso sa Pamplona, alagad sa resulta kan ginibong blood examination negativo sa caso.


Igwa man mga nagbutwang caso sa Lupi, Libmanan asin Del Gallego nakontrol man tolos sa amay na naagapan kan DA asin NMIS.

bottom of page