P1-M na droga nakumfiscar sa duwang babae

Nahulog na sa kamot kan Naga City Police Office (NCPO) asin Philippine Drug Enforcement Agency (PDEA) an duwang babae na haloy nang hinahanting sa operasyon sa ilegal na droga asin nakumfiscar an labi sa P1 milyon na cantidad kan droga sa ginibong drug buy bust operation kan Sabado, Deciembre 4 sa Amarillo St., Clupa, Barangay Calauag, Ciudad nin Naga.

An operasyon ginibo mga alas 5:00 nin aga kan pinagsarong fuersa kan NCPO asin PDEA na pigmidbid an suspechado na sinda Ronna Balcueva, 29, asin Jacqueline Geroy na nag-eestar sa barangay Calauag.

Si P/Sr. Master Sgt. Tobias Bongon III, opisyal na parataram kan NCPO nagpahayag an duwa nasa watchlist kan mga envuelto sa droga sa ciudad asin sa perang bulan na surveillance nadakop man giraray sa buy bust operation sa shabu.

Sinabi kan NCPO an saindang nagsasaging-saging mabakal nin sarong pakete nin shabu na nagcacantidad P75,000. Alagad sa ginibong body search nakakua pa an mga awtoridad nin sarong pakete kan shabu na may gabat nin 125 gramo na nagcacantidad nin kulang-kulang sa on milyon pesos.

Kan timbangon an mga nakuang droga nag-total sa 150 gramos na nagcacantidad na nin P1,020,000.00 na yaon na sa poder kan NCPO asin PDEA nganing iyo an saindang gamiton na evidencia sa pagsangat nin caso sa Acta Republica 9165 na mas midbid sa Comprehensive Dangerous Drugs Act of 2002.

An duwang suspechado detenido sa Police Station 3 kan Naga City Police Office mantang naghahalat nin commitment order hale sa jusgado. An arog kaining evidencia dai na tinutugot kan ley na makapagfiansa asin ciertong magpapasko an mga suspechado sa selda.

Alagad sinabi pa kan PNP parejong negativo an duwa sa droga base sa resulta sa laboratory test.

Parejo nang nagsayuma mag-atubang sa entrevista kan media mantang bahala na an saindang abogado sa caso.

Sinabi pa kan NCPO an sinambit na caso nagkapera sana sa mga naenot na sunod-sunod na pagkakadakop kan mga envuelto sa ilegal na droga alagad dawa may pandemya an awtoridad dai nagpapahingalo laban sa ilegal na actividad sa ciudad.