P109-M alokasyon kan CSur sa Covid response sa 2022

Dai pa kampante an Capitolio Provincial kan Camarines Sur sa padagos na pagbaba kan caso sa coronavirus disease (Covid-19) nagtagama liwat nin P109 milyon na alokasyon sa Covid response sa sunod na taon.


Sa executive budget para sa 2022 na pigsumiter ni Gobernador Migz Villafuerte sa Sangguniang Panlalawigan kabale sa P5.32 bilyon annual budget na pinaboran kan junta.


Si Vocal Romulo Hernandez kan segundo distrito kan Camarines Sur asin miembro kan Committee on Finance and Appropriation sa SP nagpahayag na nagpaseguro si Gob. Migz na tawan pa nin dakulang alokasyon an Covid response mantang dai pa aram kun dagos-dagos nang mawawara an virus sa provincia nin huli ta ini sarong pandemya.


Maging an mga experto sa salud kan Department of Health (DOH) dai pa makapaluwas nin asegurasyon sa publico kun deretso nang mawawara an Covid-19 sa nasyon.


Huli kaini, segun ki Hernandez nagpaseguro nin alokasyon an gobernador mantang sagcod sa ngunian kaipuhan dai maging kampante an publico laban sa deadly virus.


An fondo gagamiton sa Provincial Health Center, mga isolation center na dapat mapadarang ayuda kan Capitolio Provincial, mga personal protected equipment (PPEs) kan mga health workers, medical supply asin iba pang kaipuhan para sa pasyente.


Sa suplay kan vaccines an DOH iyo man an nagpapadara na dai na pig-ayon sa budget sa Covid-19 response.


Sinabi pa ni Hernandez na kun kulangon pa an nakatagamang fondo puedeng maggamit hali sa calamity fund.


An cinco por ciento kan P5.32-B sa 2022 annual budget igwang maabot sa P275 milyon an provincia, sabi pa kan vocal kan segundo distrito.


Mientras tanto, sa datus kan DOH Bicol hasta kan Domingo, Noviembre 7 an Camarines Sur an provincia igwa pang activong total na 517 caso, 12,227 mga naumayan, asin nagkaigwa nin 13,317 total na caso mantang 523 mga binawian nin buhay.


Sa listahan kan EDMERO Camarines Sur sa 1.3 milyon na populasyon maabot na sa 374,000 an nabakunahan nin 1st dose asin 255,953 2nd dose asin ini harayo pa sa 70 por cientong herd immunity. (dpa)