P16-M na ingreso kan MNWD kulang pa
Dugang na tarifa sa tubig hagad aprubaran kan LWUA
Naggaganansiya na nin milyones pesos an bagong manijamiento kan Metropolitan Naga Water District (MNWD) alagad kaipuhan maaprubaran giraray kan Local Water Utilities Administration (LWUA) an saindang masarong taon nang petisyon sa dugang na tarifa sa tubig.
Haloy nang dai nag-iimplementar nin aumento sa singil sa tarifa sa lomang P125.00 na kaipuhan an dugang na P30.00 cada metro cubico mantang an petisyon kan manijamiento pigsumiter sa LWUA kan Enero 2023 na sagcod sa ngunian mayo pang aksyon.
An dahilan tanganing mahipnoan an kakulangan nin mga pumping stations sa coverage area kan water district na kinababalihan nin mga banwaan kan Magarao, Canaman, Camaligan asin Ciudad nin Naga asin maninigo nang magbakal nin bagong makina nganing ribayan si mga nagloloma para dai maapektaran an serbisyo nin tubig sa ribo-ribong consumedores kan MNWD, sabi ni General Manager Florencio Mongoso Jr. kan makaulay kan Bicol Mail.
Kan magtukaw si Mongoso sa water district kan Agosto 2022 nalulugi nin P11 milyon alagad sa financial status sa record kan Septiembre 2023 naggaganansiya nin P16-M.
Saiya pang sinabi sa BM bulan-bulan nagdadakul an consumedores afuera kan nagdudugang an mga darakulang edificio asin subdivision nganing amay mahipnoan asin mapag-andamam maninigo an dagdag na mga pumping stations.
Sa presente ngani igwa nang mga lugar na nagluluya na an pressure kan tubig na iyo an pigreresolberan kan manijamiento.
Sa ginibong pag-aadal nangangaipo nin sampolong dugang na pumping stations na aaboton na ngunian nin cantidad P15-M hasta P20-M cada saro, kaipuhan digdi an transmission asin distribution lines na kinakarkulong abot sa P150-M sa total na P300-M hasta P350-M.
An board of director kan MNWD naghahalat nalang kan formal na surat ni Alcalde Nelson Legacion nganing nombrahan na si Mongoso bilang full-pledge general manager.
An AGM na dating jefe kan Public Employment Service Office kan City pinasuble sana kan ciudad alagad hagad ki Alcalde Nelson Legacion na butasan na nganing tukahan kan BOD na maging permanenteng GM. (dpa)