P25 na kilo kan bagas nabutwa kun igwang Kadiwa ng Pangulo

An pangako ni President Ferdinand Marcos Jr. kan panahon nin eleksyon ihuros sa P20 cada kilo kan bagas alagad madiklom pang marealisar envez nangyayari sana an baratong presyo sa P25 kun nagkakaigwa nin Kadiwa ng Pangulo asin kun nagbibisita sa Camarines Sur si PBBM maging sa iba pang lugar.

Kinumfirmar kan National Food Authority sa Bicol na nagpabakal sinda nin P25 kan magbisita sa Nabua, Camarines Sur si Marcos kan ilansar an Bagong Pilipinas Serbisyo Fair kan Septiembre 23, 2023 sa paagi kan Kadiwa ng Pangulo.

An kaparejong program ginibo kan Department of Agriculture asin NFA kan enot na magbisita digdi sa provincia an presidente asin liwat nangyari kan Septiembre 23, 24.

Sa sinambit na BPSF an ahencia nakapabakal nin cinco mil kilograms sa 1,250 na consumedores.

An ahencia na nasa lindong kan DA dai na nagsusuplay nin baratong presyo sa mga mercado huli ta prohibido na sa Rice Tariffication Law na nag-epekto kan 2019 kan panahon ni dating Presidente Rodrigo Duterte.

Sa ngunian huli kan Executive Order 39 ni PBBM nagbaba an presyo kan bagas sa mga mercado sa cantidad na P41 – P45 sa dating presyong P40 hasta P50.

Dinagdag pa kan NFA na nagdadakul nang mga paraoma an nagpapatungod sa saindang paroy kasunod kan sainda nang pig-iimplementar an kasugoan kan NFA Council na ilangkaw na an buying price hale sa dating P17 asin ginibo na sa P19 hasta P23 (bagong ani asin malinig o alang)

Kan barato pa si presyo sa buying price apektado an saindang palay procurement envez nadalagan sa pribadong kumprador na mas halangkaw an presyo. (dpa)