top of page

P3.6 milyon danyos sa nangyaring fish kill sa CSur

Labi sa 900 na mga parasira an apektado sa nangyaring fish kill sa onseng barangay sa Buhi, Camarines Sur kan mag-agi sa provincia an bagyong Paeng kan Oktubre 28.


Sa report kan Bureau of Fisheries and Aquatic Resources (BFAR) Bicol maabot sa P3.6 milyones na cantidad sa 35 toneladang mga nagkagaradan na tilapia.


Ipinahayag an causa kan fish kill iyo hababang oxygen level.


Si Noni Inolva, opisyal na parataram kan BFAR an saindang ahencia nag-aandam nin ayuda sa mga parasira nganing matabangan kan saindang hanap buhay sa pagsira.


An lokal na gobierno igwa naman inisyal na ayuda sa mga parasira na apektaran kan fish kill.


An Buhi na sakop kan Rinconada area sa Camarines Sur saro sa may halangkaw na produksyon nin tilapia na pig-susuplay sa mga mercado sa provincia.


An sektor nin paraoma sa Camarines Sur orog na si madali nang anihon an saindang paroy iyo an may dakulang destroso sa provincia.


Sinabi kan Department of Agriculture maabot na sa Php47 milyones an danyos sa agricultura. Tubig baha an mayor na nakadestroso sa paroyan sa mga apektadong provincia sa Bicol kan nakaaging calamidad.

Comments


bottom of page