P3.74-M na droga nakumpiscarkan mga awtoridad sa CamSur

Sarong dakulang acomplisimiento an pagkakakumfiscar kan mga awtoridad sa ilegal na droga sa Camarines Sur ngunian na bulan na nagcacantidad P3,740,000.00 asin iba gamit sa ilegal na actividad bilang mga evidencia.

An buy-bust operation kan mga awtoridad nakumfiscar sa tolong mga suspeks mga ala 1:35 hapon sa Zona 6, Brgy Palestina, Pili, Camarines Sur sa pangenot kan Kaogma Cops mantang kaibanan ninda an Municipal Drug Enforcement Agency kan MPS Pili, sa pangenot kan Philippine Drug Enforcement Agency (PDEA), Camarines Sur kan saindang madakop an mga suspek sa paagi nin poseur-buyer nin sarong knot-tied transparent plastic bag na may laog nin shabu na may gabat nin 50 gramo na nagcacantidad nin P3.74-M asin iba pang mga evidencia.

Sa imbestigasyon an mga suspek binisto sana sa mga alias na ‘‘Chard’’, 38 anyos, sarong paraoma asin residente kan Pili, CamSur, alias ‘‘Isko’’, 33 anyos, sarong security guard asin residente kan Pili, CamSur asin alias ‘‘Lito’’, 55 anyos taga Ciudad nin Naga. Sinda nasa listahan kan PNP komo envuelto sa ilegal na actividad asin perang bulan ginibo an pagmanman nganing maarestar an mga suspek.

An operasyon kaibahan ninda an mga mandatory witnesses mantang an manga awtoridad iguang gamit na body-worn camera na mandato sa mga awtoridad bilang pagsunod sa legal na proceso.

An mga suspek nag-aatubang na nin caso sa pagbalga kan RA 9165.

Saludo si P/Col Tyrone Dotimas, PNP Provincial Director sa Camarines Sur sa ginibong operasyon kan Pili MPS asin PDEA Camarines Sur nganing madakop an mga envuelto sa dakulang operasyon sa ilegal na actividad sa provincia.

An milyones pesos na cantidad nin droga tagulnod sa mga dorogista digdi sa provincia na posibleng ibariwas sa pagtaraid na banwaan kan Kabesira kan provincia kun dai natalikop.